28.12.2023
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
«weten géziti» jumhur reis rejep tayyip erdoghanning tünügün qilghan sözide térrorluqqa qarshi küresh üstide toxtalghanliqini xewer qildi.
xewerde, jumhur reis rejep tayyip erdoghanning, «türkiyening qed kötürüshige tosqunluq qilishni meqset qilghan lenetlik térrorluq hujumliri bizning qutluq yürüshmizni hergiz toxtitalmaydu. 36 saet ichide 54 térrorchi ujuqturuldi. shéhitlirimizning qéni hergiz yerde qalmaydu» dégenliki bildürüldi.
«sabah géziti» tashqi ishlar ministiri xaqan fidanning amérikiliq mensepdishi bilen körüshkenlikini xewer qildi.
xewerde, «tashqi ishlar ministiri xaqan fidan tünügün amérika tashqi ishlar ministiri bilinkén bilen téléfonda körüshti. ministir fidan shiwitsiyening ezaliqigha munasiwetlik xizmet jeryanining türkiye büyük millet mejlisi (parlaménti) da dawam qiliwatqanliqini bildürüp, F-16 ayropilanlirining sétip bérilishi heqqide, amérika hökümiti we amérika palatasining ittipaqlishish rohigha uyghun heriket qilishi we bergen wedilirini emelge ashurishi kéreklikini bildürdi» déyildi.
«höriyet géziti», dölet mudapie ministiri yashar gülerning tünügün iraq we süriyening shimalida élip bérilghan heriketlerde 59 térrorchining bir terep qilinghanliqini éytqanliqini xewer qildi.
«star géziti», rusiye muawin bash ministiri aléksandir nowakning türkiyede tebiiy gaz merkizi qurush layihesining yol xeritisi pat yéqinda testiqlinidighanliqini bildürüp: «bu qurulushning 2024 - yili ishqa ashurulishini ümid qilimiz» dégenlikini xewer qildi.
«xeber türk géziti», girétsiyening panatinaykos komandisi bilen kélishim hasil qilghan meshqawul fatih terimning afinada élan qilghan bayanatida: «bilishimche panatinaykos uzun yillardin buyan chémpiyon bolalmidi, men chémpiyon bolush üchün keldim» dégenlikini xewer qildi.
