10.03.2023
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi: «xabertürk» géziti: türkiye büyük milliy mejlisi (parlaménti) reisi mustafa shentopning birleshken döletler teshkilati xewpsizlik kéngishining yer shari tinchliqini berpa qilalmighan qurulmisini özgertish kéreklikini otturigha qoyup: «besh döletning barliq döletlerge munasiwetlik mesililerde qarar chiqirishini emdi qobul qilishqa we uni dawamlashturushqa bolmaydu» dégen sözlirini oqurmenliri bilen ortaqlashti.
«weten» géziti: dölitimiz (türkiye jumhuriyiti) tashqi ishlar ministiri mewlüt chawushoghluning söz qilip, xelqara jemiyetning 6 – féwraldiki qahramanmarashni merkez qilghan yer tewreshlerdin kéyin namayan qilghan küchlük hemkarliqining türkiyening keypiyatini yaxshilighanliqi we uninggha küch qoshqanliqini éytqanliqi hemde sözini dawamlashturup: «biz aldimizdiki eslige kélish we qayta qurup chiqish musapiside yawropa ittipaqi bilen bolghan hemkarliqimizni dawamlashturimiz» dégenlikini xewer qildi.
«sabah» géziti: dölet mudapie ministiri xulusi aqarning türkiyening tirishchanliqi sayisida hasil qilinghan rusiye - ukraina ashliqini tashqi dunyagha yötkeshke munasiwetlik 18- mart mudditi toshidighan ashliq karidori kélishimining mudditini uzaratish tirishchanliqining dawamlishiwatqanliqini, rusiye bilen ukrainaning bu mesilige ijabiy qarawatqanliqini éytqanliqini yazdi.
«yéngi shepeq» géziti: éksportni ashurush yolini qetiylik bilen dawamlashturuwatqan türkiyening seudi erebistangha qilghan éksportida zor ilgirileshlerni qolgha keltürgenlikini؛ türkiyening seudi erebistangha qilghan éksportining aldinqi yilining oxshash mezgilige sélishturghanda 32 hesse éship, eslidiki 11 milyon 209 ming dollardin 367 milyon 363 ming dollargha yetkenlikini xewer qildi.
«star» géziti: türkiyening gérmanlar sayahetke baridighan döletler tizimlikining aldinqi qataridin orun alghanliqini, gérmaniye sayahet kopiratipliri jemiyiti reisi norbért fibigning bayanat bérip: «biz dékabir, yanwar we féwral aylirida küchlük zakaz qobul qilduq. türk shériklirimiz we dostlirimiz üchün yaxshi bolghini türkiyening eng yuqiri pellidin orun alghan bolushidur» dégenlikini yazdi.
