25.07.2022

 türkiye awazi radiyosi: «‹xewer türk› géziti», «jumhur reis erdoghan, <girétsiye lozan shertnamisige xilapliq qiliwatidu> dédi» serlewhilik xewiride, töwendiki uchurlarni oqurmenlirining diqqitige sundi:

jumhur reis rejep tayyip erdoghan, buningdin 99 yil ilgiri imzalanghan «lozan tinchliq shertnamisi» ge asasen türkiyening quruqluq chégra liniyelirining sizip chiqilghanliqini, girétsiyede qalghan türk az sanliqlarning hoquqining kapaletke ige qilinghanliqini, hemde türkiyening déngiz sahillirigha yéqin girétsiye arillirining herbiy salahiyitining békitilgenlikini tekitlep mundaq dédi: «lékin, yéqindin buyan, bolupmu shertnamide belgilengen türk az sanliqlirining heq - hoquqliri girétsiye teripidin nezerdin saqit qilinmaqta, yaki qesten xilapliq qilinmaqta. dölitimizning buni qobul qilishi esla mumkin emes.»

«‹sabah› géziti», «türkiye halqiliq dölet» serlewhilik xewiride, jumhur reis rejep tayyip erdoghanning, türkiyening rusiye – ukraina urushida terepler bilen her  sewiyede muzakire élip bériwatqan, diyaloglarni ochuq tutuwatqan, yéqinqi ashliq kélishimidikige oxshashla mumkin bolghan sahelerde hemkarliqni ishqa ashuruwatqan halqiliq dölet ikenlikini tekitlep, «bizge ishengen dost döletlerni, musheqqetlik peytlerde herdaim qollap, ümidini yoqqa chiqarmiduq» dégen sözlirini neqil keltürdi.

«‹weten› géziti», «ashliq karidorida türkiye üchün halqiliq wezipe» serlewhilik xewiride, munu uchurlarni oqurmenlirining diqqitige sundi:

22 – iyul küni imzalanghan ukrainadiki ashliqlarning qaradéngiz arqiliq yötkilishige munasiwetlik kélishimidin kéyin, istanbulda heriket merkizi qurulidu. merkezde xizmet ishleydighan etretke bir türk admiral mesul bolidu. ukrainaliqlar bilen ruslar ayrim ishxanilarda ishleydu. bu arqiliq texminen 20 milyon tonna ashliqning dunyagha toshulushining yoli échilidu.

«‹yéngi shepeq› géziti», «ayasofya ikki yilda 6 milyon 500 mingdin artuq ziyaretchini kütüwaldi» serlewhilik xewiride, töwendiki uchurlarni oqurmenlirining diqqitige sundi:

istanbul pethi qilinghangha qeder 916 yil chérkaw, 1453-yildin bashlap jame süpitide ishlitilgen ayasofya, 1934-yili chiqirilghan qarargha asasen uda 86 yil  muzéy süpitide xizmetke sunuldi. 2020-yili 10 – iyul küni chiqirilghan qarargha asasen tekrar jamege aylandurulghan «büyük ayasofya jamesi», 2020 – yili 24 – iyul küni oqulghan jüme namizi arqiliq ibadetke échiwétildi. buningdin 2 yil ilgiri ibadetke échiwétilgen  «büyük ayasofya jamesi», ikki yilda 6 milyon 500 mingdin artuq ziyaretchini kütüwaldi.

«‹höriyet› géziti», «türkiye 4-nöwetlik dunya köchmenler tenheriket musabiqisige teyyarlanmaqta» serlewhilik xewiride, munu uchurlarni oqurmenlirining diqqitige sundi:

dunya köchmenler tenheriket musabiqisi dunya boyiche eng chong eneniwi tenheriket musabiqisige aylandi.

  4-nöwetlik dunya köchmenler tenheriket musabiqisi, 29-séntebirdin 2-öktebirgiche bursa wilayitining iznik  nahiyeside ötküzülidu. musabiqige 100 din artuq dölettin 3000 tenheriketchi qatnishidu.