21.07.2022

«‹yéngi shepeq› géziti», «jumhur reis erdoghan: <amérika hazir firat deryasining sherqidin ayrilishi kérek> dédi» serlewhilik xewiride, munu uchurlargha orun ajratti:

jumhur reis rejep tayyip erdoghan irandin qaytishta élan qilghan bayanatida, «amérika hazir firat deryasining sherqidin ayrilishi kérek. astana musapisidin chiqqan bayqash bu. chünki amérika u yerdiki térorluq teshkilatlirini béqiwatidu» dédi.

«‹star› géziti», «tarixiy ehmiyetke ige bashliqlar yighini rusiye metbuatliridin orun aldi» serlewhilik xewiride, munu uchurlargha orun ajratti:

iranning paytexti téhranda, türkiye, rusiye we iran otturisida ötküzülgen astane formatliq 7 - nöwetlik üch terep bashliqlar yighini rusiye taratqulirida keng xewer qilindi. «izwéstiya» gézitidiki xewerlerde: «2017 - yili süriyening weziyitini normallashturush üchün qurulghan bu munber rusiye, iran we türkiyeni birleshtürmekte» dégen sözler ishlitildi.

«‹sabah› géziti», «fuat oktayning sherqiy aq déngiz heqqidiki uchuri؛ <abdulhemid xan paraxotimiz seperge atlinidu> dédi» serlewhilik xewiride, munu uchurlargha orun ajratti:

muawin jumhur reis fuat oktay tünügün shimaliy qibris türk jumhuriyitide söz qilip, dunya boyiche eng ilghar burghilash paraxotlirining birsi bolghan abdulhemid xanning awghustta sherqiy aq déngizdiki xizmitini bashlaydighanliqini éytti.

«‹xeber türk› géziti», «yerlik aptomobil tog istanbulda körgezme qilindi» serlewhilik xewiride, munu uchurlargha orun ajratti:

istanbulda échilghan éléktronluq istémal mehsulatliri yermenkisi «CES 2022» de tog shirkiti tonushturush aptomobilini körgezme qildi. zorlu yermenke merkizide ammigha sunulghan aptomobil yanwardimu éléktronluq istémal mehsulatliri yermenkisi «CES » de tonushturulghan we togning kelgüsi nishanini dunya jamaetchilikige élan qilghan idi.

«‹höriyet› géziti», «istémalchilarning ishench körsetküchi örlidi» serlewhilik xewiride, munu uchurlargha orun ajratti:

türkiye istatistika instituti we türkiye merkizi bankisining hemkarliqida élip bérilghan istémal yüzlinishini tekshürüsh netijisidin hésablanghan pesil xaraktérlik tengshelgen istémalchilarning ishench körsetküchi, aldinqi aydikige sélishturghanda %7.4 ashti. 6 - aydiki körsetküch 63.4 bolup, 7-ayda 68.0 ge chiqti.