08.12.2021
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹höriyet› géziti», «erdoghan <paris qoltuqidiki xelqlerning hemmisi bizning öz qérindashlirimizdur> dédi» serlewhilik xewiride, töwendiki melumatlarni oqurmenlirining diqqitige sundi:
jumhur reis rejep tayyip erdoghan bilen qatar emiri sheyx temim bin hemed alsanining emirlik diwadida ishqa ashurulghan ayrim uchrishishidin kéyin, ikki dölet ministirliqliri otturisida 15 türlük ortaq kélishim imzalandi. jumhur reis erdoghan, kélishimlerning imzalinishidin kéyin, qatar – türkiye birleshme armiye qomandanliq ishtabini ziyaret qildi, hemde bu yerde qilghan sözide, mundaq dédi: «türkiye bolush süpitimiz bilen, qatar bilen birlikte pars qoltuqi rayonining tinchliqi we bext-saaditige nahayiti zor ehmiyet bérip kéliwatimiz, biz bu döletlerde sürkilish körüshni xalimaymiz, milliti, mezhipi qandaq bolushidin qetiynezer, paris qoltuqidiki xelqlerning hemmisi bizning öz qérindashlirimizdur.»
«‹yéngi shepeq› géziti», «engliye türkiye bilen ittipaqdash bolushqa teyyar ikenlikini bildürdi» serlewhilik xewiride, munu uchurlargha orun ajratti:
engliye dölet mudapiesi we bixeterlik munbirining reisi olga maytland, türkiyening dölet bixeterliki saheside tashlawatqan qedemlirining muhimliqini tekitlep, engiliyening bu sahede türkiye bilen uchur – melumat almashturush arzusi barliqini we we türkiyening ittipaqdash süpitide qobul qilinishi kéreklikini tekitlidi.
«‹star› géziti», «talibanlardin türk shirketlirige chaqiriq» serlewhilik xewiride, töwendiki uchurlarni oqurmenlirining diqqitige sundi:
afghanistandiki taliban hökümitining su we énérgiye ishliri ministiri yardemchisining wekili mujiburrahman ömer, türk meblegh salghuchilarni öz ichige alghan dunyaning herqaysi jayliridiki meblegh salghuchilarni afghanistangha meblegh sélishqa chaqirdi.
«‹sabah› géziti», «türkiyening uchush tori 335 nuqtigha yetti» serlewhilik xewiride, munu uchurlargha orun ajratti:
puqralar awiyatsiyesi sahesidiki muweppeqiyetliri bilen «dunyaning eng keng dairilik uchush tori» gha ige döletlerning aldinqi qataridin orun alghan türkiye, 2003-yili 50 dölettiki 60 nuqtigha hawa qatnishini ishqa ashurghanidi, bu yil uchush nuqtilirining sanini 128 dölette 335 ke yetküzüp, «dunyadiki eng keng dairilik uchush tori» gha ige döletlerning birige aylandi.
«‹xewer türk› géziti», 2022 – yili MSC Cruises türkiyege qaytidu» serlewhilik xewiride, munu uchurlarni oqurmenlirining diqqitige sundi:
türkiye, 2022-yili yazda MSC Cruises ning aqdéngiz sayahet pirogrammisigha qaytidu. aydin wilayitining qushadasi nahiyesi, déngizda sayahet qilidighan méhmanlarning tunji chiqish port éghizi bolidu. MSC Cruises sayahet paraxotining dériktori enjélo kapurro, «biz türkiyege qaytip kélidighanliqimiz üchün cheksiz hayajan ilkidimiz» dédi.
