21.06.2021
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹star› géziti», «erdoghan <köchmenler we musapirlarni köchüshke mejburlaydighan sewebler yoqitilishi shert> dédi» serlewhilik xewiride, töwendiki melumatlarni oqurmenlirining diqqitige sundi:
jumhur reis rejep tayyip erdoghan, «dunya musapirlar küni» munasiwiti bilen élan qilghan bayanatida, «köchmenler we musapirlarni köchüshke mejburlaydighan seweblerning yoqitilishi, toqunushlar we muqimsizliqlargha xatime bérilishi, hemde köchmenler we musapirlarning öy – makanlirigha qaytalishi üchün tirishchanliq körsitilishi shert» dédi.
«‹höriyet› géziti», «chawushoghlu girétsiye heqqide bayanat élan qildi» serlewhilik xewiride, munu uchurlargha orun ajratti:
girétsiye tashqi ishlar ministiri nikos déndiasning, «biz türkiyening tajawuzchiliqidin türkiyening özige qarshi qoral süpitide paydilanduq» teriqisidiki bayanatigha türkiyedin jawab keldi. tashqi ishlar ministiri mewlüt chawushoghlu, «girétsiye ighwagerchiliklerdin, küshkürtküchi qedemliridin we tetür teshwiqat tarqitishtin waz kéchishi kérek» dédi.
«‹xewer türk› géziti», «ukraina diplomatiye ministiri ukrainaliqlarni dem élish üchün antalyagha sayahet qilishqa teklip qildi» serlewhilik xewiride, töwendiki uchurlargha orun ajratti:
ukraina tashqi ishlar ministiri dmitri kuléba, ukrainaliqlarni tetil üchün antalyagha sayahetke bérishke teklip qilip mundaq dédi: «ukrainaliq sayahetchilerni hem güzel déngizning peyzini süreleydighan, hemde türkiye sahib boluwatqan qedimki tarixini tetqiq qilish we öginish pursitige érisheleydighan antalyagha sayahetke bérishqa teklip qilimen.»
«‹sabah› géziti», «uchush ruxsiti ruslarni cheksiz hayajangha tashlidi» serlewhilik xewiride, munu uchurlarni oqurmenlirining diqqitige sundi:
rusiye, «kowid – 19» yuqumi sewebidin türkiyege qoyghan uchush cheklimisini bikar qildi. ruslar, 1 saet ichide sayahet shirketlirining intérnét tor betlirini meshghulat élip baralmaydighan ehwalgha keltürüp qoydi. 5 ayda 7 milyon rus sayahetchining dölitimiz (türkiye) ge sayahetke kélishi kütülmekte.
«‹yéngi shepeq› géziti», «firansiyede chiqidighan ‹lé figaro› géziti oqurmenlirini türkiyege sayahetke bérishqa chaqirdi» serlewhilik xewiride, töwendiki melumatlarni oqurmenlirining diqqitige sundi:
firansiyede chiqidighan «‹lé figaro› géziti» (Le Figaro), «türkiyege sayahetke bérish üchün 5 türlük seweb» serlewhilik maqale élan qildi. türkiyede sayahet qilishqa tégishlik jaylar heqqide teklipler sunulghan maqalide, «göbeklitepe, bodrum, mughla, shakirin jamesi, sherq téz süretlik sayahet poyizi we bir qisim dangliq kawap dukanliri» choqum bérishqa we ziyaret qilishqa tégishlik jaylar süpitide tilgha élinidu.
