07.06.2021
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹höriyet› géziti», «jumhur reis erdoghan uqturdi, térrorluq teshkilatigha éghir zerbe» serlewhilik xewiride, töwendiki uchurlargha orun ajratti:
jumhur reis rejep tayyip erdoghan, ammiwi ortaqlishish tor béti Twitter sehipiside élan qilghan bayanatida, dölet bixeterlik orginining muweppeqiyetlik herikiti arqiliq bölgünchi térrorluq teshkilati p k k ning atalmish yuqiri derijilik rehbiri we shimaliy iraqtiki mahmur omumiy ishlar mesuli selman bozqirning bir terep qilinghanliqini uqturdi.
«‹star› géziti», «aqar: <türkiye déngiz armiyesi barliq zamanlarning rékortini buzup tashlidi> dédi» serlewhilik xewiride, munu uchurlarni oqurmenlirining diqqitige sundi:
türkiye dölet mudapie ministiri xulusi aqar, «türkiye déngiz armiyesi, 200 ming saet/yil heriket qilish arqiliq barliq zamanlarning rékortini buzup tashlidi. ey déngiz armiyemiz! siler tariximizgha yéngi bir sehipe yazdurdunglar, yéngi bir sehipe ilawe qildinglar» dédi.
«‹sabah› géziti», «eng ünümlük ballistik qoghdash alahidilikige ige» serlewhilik xewiride, töwendiki bayanlargha orun ajratti:
jumhur reislik mehkimisi dölet mudapiesi sanaiti orginining bashliqi ismail demir, ammiwi ortaqlishish tor bétidiki sehipiside élan qilghan bayanatida, « Leopard 2A4» tipliq tankilar üchün ishlepchiqirilghan bironéwiklarni bir yürüsh ishlepchiqirish we tankilargha seplesh xizmitining bashlanghanliqini tekitlep mundaq dédi: «bu bironéwiklar, nöwette dunya armiyeliridiki < Leopard 2A4> tipliq tankilarda ishlitiliwatqan eng ünümlük ballistik qoghdash alahidilikige ige.»
«‹xewer türk› géziti», «pakdemirli su mehsulatliri éksportimizning 1 milyard 63 milyon dollargha yetkenlikini éytti» serlewhilik xewiride, munu uchurlarni oqurmenlirining diqqitige sundi:
yéza igilik we ormanchiliq ishliri ministiri bekir pakdemirli, 2020 – yili su mehsulatliri ishlepchiqirishning 785 tonnigha, éksport reqimining 1 milyard 63 milyon dollargha yetkenlikini éytti.
«‹yéngi shepeq› géziti», «türkiye hawa yolliri shirkitidin 15 ayning rékorti» serlewhilik xewiride, munu uchurlargha orun ajratti:
2021 – yilining deslepki 5 éyida yawropa hawa tewelikide eng köp uchushni ishqa ashurghan hawa yolliri shirkiti bolghan türkiye hawa yolliri shirkiti, jüme küni ishqa ashurghan 863 uchush bilen, yéqinqi 15 aydin buyanqi eng köp kündilik uchush sanigha érishti.
