05.02.2021

türkiye awazi radiyosi: «yéngi shepeq» géziti: «erdoghan: oqughuchilarni jelp qilish musabiqiside dunyadiki aldinqi 10 ning ichige kirduq (dédi)» serlewhilik xewiride, jumhur reis rejep tayyip erdoghanning türkiye uniwérsitétlirigha oqughuchi jelp qilish riqabitide dunyaning aldinqi qatardiki 10 döletning birige aylanghanliqini éytqanliqigha dair uchurlargha orun berdi.

gézitning xewiride körsitilishiche, türkiyening uniwérsitétqa kirish jehette yawropada birinchi orunda turidighanliqini tekitligen erdoghan, dunyaning aldinqi qatardiki uniwérsitétlirining hörmetke sazawer oqutquchilirining yiraqtin ders ötüsh usuli arqiliq türkiyediki uniwérsitétlarda ders ötüshige imkaniyet yaritip bérilidighanliqini otturigha qoyghan.

«xabertürk» géziti: «türkiyediki chet ellik meblegh salghuchilar mal - mülükni qolida tutup turmaqta» serlewhilik xewiride, türkiyedin muqim mülük sétiwalghan chet elliklerning %92.7 sining öy – mülüklirini qolida tutup turuwatqanliqini, chet ellik meblegh salghuchilarning her yili otturiche üch ay waqtini türkiyede ötküzüwatqanliqini yazdi.

xewerde, öy – mülük sétiwalghan meblegh salghuchilarning yérimi ikkinchi bir muqim mülük sétiwalghanliqining otturigha chiqqanliqi؛ bashqurghuchilar, inzhénérlar, sodigerler, doxturlar we pénsiyege chiqqanlarni öz ichige alghan chet ellik meblegh salghuchilarning otturiche yéshining 50.6 ikenliki qeyt qilindi.

«star» géziti: «shyawmi türkiyede ishlepchiqirishni bashlaydu» serlewhilik xewiride, dunyaning üchinchi chong eqliyfon ishlepchiqarghuchi shirkiti — shyawmining 2021 - yilining birinchi peslide 30 milyon dollar meblegh sélip türkiyede eqliyfon ishlepchiqirishni bashlaydighanliqini؛ shirketning istanbulgha yilda besh milyon dane téléfon ishlepchiqirish iqtidarigha ige zawut quridighanliqini we türkiyening dunyadiki shiyawmi eqliyfonliri ishlepchiqirilidighan tötinchi dölet bolidighanliqini ilgiri sürdi.

«sabah» géziti: «besh yilda yilliq altun ishlepchiqirish miqdari 100 tonnigha yétidu» serlewhilik xewiride, énérgiye we tebiiy bayliqlar ministiri fatih dönmezning, türkiyede her yili 42 tonna altun ishlepchiqiriliwatqanliqini bildürüp: «nishanimiz besh yilda 100 tonna yilliq ishlepchiqirishni qolgha keltürüsh» dégenlikini we türkiyening dunyadiki her yili 100 tonnidin artuq mehsulat ishlepchiqiridighan 10 dölet qataridin orun élishni xalaydighanliqini éytqanliqini yazdi.

«weten» géziti: «türkiyening yiraq musapilik bashqurulidighan bombisi — atmaja sinaq qilindi» serlewhilik xewiride, roketsan (rakétamiyot soda – sanaet shirkiti) tetqiq qilip yasap chiqqan uzun musapilik paraxotqa qarshi bashqurulidighan bomba — atmajaning sinopta sinaq qilinghanliqini yazdi.

xewerde, sinaq qilish paaliyitige déngiz armiye qomandani admiral adnan özbal bilen waliy erol qaraömeroghlu qatarliqlarningmu qatnashqanliqi؛ admiral özbalning sinaqtin kéyin söz qilip: «bizning milliy mehsulatimiz atmaja dostqa xatirjemlik, düshmenge wehime bolidu» dégenliki qeyt qilindi.