02.02.2021

«yéngi shepeq géziti», türkiye jumhur reisi rejep tayyip erdoghanning türkiye inzhénérliri ishlepchiqarghan shopursiz éléktir aptobusini sinaq qilghanliqini xewer qildi.

xewerde, rejep tayyip erdoghanning twittérda uchur hembehirlep: «kabént yighinigha, türk inzhénérlar teripidin yasalghan shopursiz éléktir aptobus ‹atak éléktirik› bilen barimiz» dégenliki qeyt qilindi.

«star géziti», bügüngiche yawropa ittipaqining we amérikaning türkiye we bashqa döletler toghrisida doklat élan qilip kelgenlikini éytqan türkiye tashqi ishlar ministiri mewlüt chawushoghluning, «türkiye jumhuriyiti tashqi ishlar ministirliqi bolush süpitimiz bilen, her yili ‹qaysi dölette islam düshmenliki, chet elliklerge düshmenlik qilish, irqiy ayrimichiliqni mezmun qilghan söz-heriketler› toghrisida doklat teyyarlap dunyagha ashkarilaymiz. emdi türkiyemu özining doklatlirini insaniyet üchün teyyarlashni dawamlashturidu» dégenlikini xewer qildi.

«sabah géziti», türkiye dölet mudapie ministiri hulusi akarning taghliq qarabaghda urush toxtitishni qoghdash üchün wezipe öteydighan türkiye-rusiye ortaq merkizining xizmitini bashlighanliqini bildürüp: «ümidimiz we tilikimiz-bashqa barliq xizmetler bilen birlikte, bu merkezning küch chiqirishi bilen urush toxtitishning uzun muddetlik bolushi, muqimliqning kapaletke ige qilinishi, rayonda tinchliq we xatirjemlikning ornitilishidur» dégenlikini xewer qildi.

«xeber türk géziti», énérgiye we tebiiy bayliqlar ministiri fatih dönmezning 2020-yili néfit ishlepchiqirish miqdarining 2019-yiligha sélishturulghanda 1.5 milyon waril éship 2 milyon warilgha yetkenlikini uqturghanliqini xewer qildi.

«weten géziti», antalya sheher kéngishi sayahet ishliri guruppisining bashliqi rejep yawuzning, sayahetchilikte eng töwen bolidighan yanwar éyining, 2020-yilida iyul, awghust we séntebir aylirining aldigha ötüp, 2 milyon 287 ming sayahetchi bilen yilning chémpiyon éyi bolghanliqini bildürgenlikini xewer qildi.