29.01.2021
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi: «sabah» géziti: «türkiye ege déngizi, sherqiy aqdéngiz we qibristiki hoquqlirini qoghdaydu» serlewhilik xewiride, 2021 – yilining tunji qétimliq dölet xewpsizlik kéngishi yighininining jumhur reis rejep tayyip erdoghanning riyasetchilikide chaqirilghanliqini yazdi.
gézitning xewiride körsitilishiche, dölet xewpsizlik kéngishi yighinidin kéyin élan qilinghan bayanatta, türkiyening ege déngizi we sherqiy aqdéngiz we qibristiki xelqara qanunda körsitilgen hoquqini qoghdash iradisining qetiy ikenlikining tekitlinip: «yighinida, rayonimizdiki muqimsizliqning asasliq menbesi boluwatqan térrorluq teshkilatlirining jenub terep qoshnilirimizning térritoriyesidiki mewjutluqigha xatime bérish dairiside tashlanghan qedemler muzakire qilindi, bu mesilige chétishliq barliq xelqaraliq küchler mesuliyitini ada qilishqa teklip qilindi» dégen ibarilerge orun bérilgen.
«weten» géziti: «üch milyon 500 ming qutiliq ikkinchi türküm waksina istanbulda» serlewhilik xewiride, türkiyening xitay sétiwalghan yuqum waksilirining dawamliq kéliwatqanliqigha isharet qilinip, waksinilarning 10 milyon qutiliq qismining ikkinchi türkümining bügün etigen türkiyege keltürülgenlikini yazdi.
xewerde, xitaydin zakaz qilinghan tunji türkümdiki üch milyon qutiliq tunji türküm waksinining 2020-yili 30-dékabirda türkiyege kelgenliki we 14-yanwarda sehiye xizmetchilirige waksina emleshning bashlighanliqi؛ waksinilarning 10 milyon qutiliq ikkinchi türkümining alte yérim milyonluq birinchi bölümining 25-yanwar düshenbe küni etigende türkiyege keltürülgenliki qeyt qilindi.
«yéngi shepeq» géziti: «yerlik waksina téximu ishenchlik bolidu» serlewhilik xewiride, türk pen - tetqiqatchiliri tetqiq qilip yasawatqan yerlik waksinining kowid – 19 yuqumigha taqabil turush ünümining téximu yuqiri we ishenchlik derijisining téximu küchlük bolidighanliqi toghrisidiki uchurlargha orun berdi.
gézitning xewiride körsitilishiche, türkiye pen- téxnika tetqiqat orgini — tübitak bashliqi hasan mandal yerlik waksina tetqiqati toghrisida melumat bérip: «bu waksinilar chet elde tetqiq qiliniwatqan waksinilargha oxshimaydu, bularning wirusqa qarshi ünümi we ishenchilik derijisi téximu yuqiri bolidu» dégen.
«star» géziti: «engliyening türkiye bilen hemkarlishish iradisi qetiy» serlewhilik xewiride, engliyening enqerede turushluq bash elchisi dominik chilkotning, dölitining mudapie saheside türkiye bilen birlikte heriket qilishni we mudapie sanaiti saheliri ara hemkarliqni dawamlashturush iradisining qetiy ikenlikini, shundaqla her ikki dölettiki shirketler we istémalchilarning bir - birining mehsulatlirini sétiwélish arzusining küchlük ikenlikini otturigha qoyghanliqini yazdi.
«xabertürk» géziti: «türkiyediki alte sheher dunyadiki eng bixeter sheherler tizimlikige kirdi» serlewhilik xewiride, Numbeo tetqiqat shirkitining 2020- yilidiki eng bixeter sheherler tizimlikini élan qilghanliqini we mezkur tizimlikke türkiyedin alte sheherning kirgüzülgenlikini, bularning ichide eskishehrining %82.45 awazgha ériship sekkizinchi rettin orun alghanliqini yazdi.
gézitning xewiride körsitilishiche, eskishehir bilen birlikte türkiyening antalya, bursa, izmir, enqere, istanbul qatarliq sheherlirimu bixeter sheherler tizimlikidin orun alghan.
