19.01.2021
bügünki türkiye metbuatliridin tallap teyyarlighan xewerlirimiz töwendikiche:
türkiye awazi radiyosi: «hörriyet géziti», türkiye jumhur reisi rejep tayyip erdoghanning tünügün (2021-yili 18-yanwar) bayanat élan qilip, maariptin sehiyegiche, qatnashtin énérgiyegiche, sanaettin sodighiche bolghan her sahede, muwapiq ilgirileshlerni qolgha keltürüwatqanliqlirini éytqanliqini xewer qildi.
xewerde, rejep tayyip erdoghanning: «iqtisadta küchlük yüksélish üchün zörür islahatlarni qilip, ilghar siyasetlerni qetiy ijra qilimiz. dölitimizning yoshurun küchini, sélinma, ishlepchiqirish, iqtisadiy éshish, ishqa orunlashturush we éksportni merkez qilghan qarash bilen heriketke keltürimiz» dégenliki qeyt qilindi.
«xeber türk géziti», türkiye tashqi ishlar ministiri mewlüt chawushoghluning, tünügün paytext enqerede gérmaniye tashqi ishlar ministiri hayko maas bilen körüshkendin kéyin, birlikte axbarat élan qilish yighini ötküzgenlikini xewer qildi.
xewerde, ikki ministirning türkiye bilen yawropa ittipaqi otturisidiki munasiwetlerde yiraqqa qarash lazimliqini eskertip, musbet küntertipni tekitligenliki qeyt qilindi.
«star géziti», sakarya gazliqda tebiiy gaz bayqalghandin kéyin, burghilashqa bashlanghan «1-türkeli» quduqidiki burghilashning 77 künde axirlashqanliqini xewer qildi.
xewerde, fatih burghilash paraxoti 2020-yili 5-noyabir bashlighan burghilash xizmetliride, «1-türkeli» quduqi 3 ming 920 métir chongqurluqqiche burghilandi.
«sabah géziti», sayahet merkezliridin biri bolghan mughlaning, wuxen wirusi(Kovid-19) mezgili bolsimu, sunulghan bixeter sayahet xizmetliri sayisida, engliyeliklerning waz kechmes sayahet makanigha aylanghanliqini xewer qildi.
xewerde, mughlagha ötken yili (2020) 695 ming 314 sayahetchining kelgenliki, buning ichide engliyedin 309 ming 717 sayahetchining kelgenliki we birinchi orunda turidighanliqi qeyt qilindi.
bildürülishiche, rusiyelik sayahetchiler 159 ming 397 kishi bilen ikkinchi orunda, ukrainaliq sayahetchiler 127 ming 564 kishi bilen üchinchi orunda, polshaliq sayahetchiler 17 ming 424 kishi bilen tötinchi orunda we gérmaniyelik sayahetchiler 16 ming 313 kishi bilen beshinchi orunda turidiken.
