18.01.2021

türkiye awazi radiyosi: «star» géziti: «türkiyege yéqinlishish üchün özara riqabetleshmekte» serlewhilik xewiride, ereb médiyasi, qatar émbargosigha xatime bergen «töt ereb döliti» — seudi erebistan, ereb birleshme xelipiliki, behreyn we misirning türkiye bilen munasiwetlirini eslige keltürüsh üchün özara beygige chüshkenlikini yazdi.

ereb  médiyasining ilgiri sürüshiche, misir bilen ereb birleshme xelipiliki yéqin kelgüside türkiyening liwiyediki telep we menpeetlirige zit heriketler bilen shughullanmaydiken we liwiyege alaqidar siyasetliridin waz kéchish mumkinchiliki bar iken.

«sabah» géziti: «yerlik uchquchisiz hawa apparatliri körünmeydighan tehditlerni bayqiyalaydu» serlewhilik xewiride, milliy téxnologiyeliri bilen dunya ellirining küchlük diqqitini tartqan türkiyening yerlik uchquchisiz hawa apparatigha seplengen yéngi sistémisining yene bir qétim küchlük ghulghula qozghaydighanliqini yazdi.

xewerde, ximiyelik, biyologiyelik, radiologiyelik we yadro tehditini bayqash üchün yasalghan razwédka sistémisining uchquchisiz ayropilangha seplengenliki؛ bu sistémining murekkep meshghulat muhitida charlash élip bérip, munasiwetlik orunlarni mölcherler bilen  del waqtida teminlep, xeterning chong - kichiklikini otturigha qoyidighanliqigha isharet qilindi.

«weten» géziti: «ruslar türk salmon béliqini yaxshi kördi» serlewhilik xewiride, ötken yili sherqiy qara déngizdin rusiyege 10 ming 715 tonna qara déngiz salmon béliqi éksport qilinip, 49 milyon 992 ming 254 dollar kirim qilinghanliqini yazdi.

gézitning xewiride körsitilishiche, aldinqi yili bu rayondin rusiyege 3595 tonna qara déngiz salmon béliqi éksport qilinip 20 milyon 670 ming 358 dollar payda élinghan؛ bashqiche qilip éytqanda, ötken yili rusiyege qilinghan qara déngiz salmon béliqi éksporti aldinqi yildikige sélishturghanda %198, qimmiti %142 ashqan.

«yéngi shepeq» géziti: «bangladéshliqlarmu BIP ni tallidi» serlewhilik xewiride, uchurlishish epi watsapning «yéngi toxtamini téngishi»din kéyin, türkiyening yerlik uchurlishish epi — BIP qa bolghan qiziqishning dölet chégraliridin halqip, bangladéshliqlarmu eng yaqturghan epige aylanghanliqini؛ BIP ning ep dukinida biraqla 92 qedem örligenlikini yazdi.

«xabertürk» géziti: «mesut özil istanbulda» serlewhilik xewiride, engliyening arsénal komandisidin ayrilghan dunyagha dangliq putbolchi mesut özilning fenerbahche komandisi bilen toxtam tüzüp istanbulgha kelgenlikini we bayanat bérip: «méning bir chüshüm réalliqqa aylandi» dégenlikini yazdi.

xewerde, fenerbahche komandisi mestaniliri töt köz bilen kütüwatqan mesut özilning yötkilish jeryanining resmiy axirlashqanliqi qeyt qilindi.