24.12.2020

«‹xewer türk› géziti», «erdoghanning amérika we yawropa ittipaqigha yollighan uchuri» serlewhilik xewiride, munu melumatlargha orun ajratti:

jumhur reis rejep tayyip erdoghan 2021 - yili amérika we yawropa ittipaqi bilen yéngi bir bet échilidighanliqini bildürdi.  amérikaning türkiyeni özidin yiraqlashturidighan istratégiyelik korliqtin uzaqlishishini ümit qilidighanliqini teketlidi we amérikaning yéngi prézidénti jo baydénningmu türkiye-amérika munasiwetlirige kéreklik derijide köngül bölidighanliqigha ishinidighanliqini bildürüp, «kelgüsi dewr tashqi siyasette türkiyening yüksilish dewri bolidu» dédi.

«‹star› géziti»,  «oruch reis burghulash paraxoti sherqiy aqdéngizda» serlewhilik xewiride, munu uchurlargha orun ajratti:

burghulash paraxoti paraxoti oruch reis sherqiy aqdéngizdiki paaliyetlirini daamlashturush üchün antalya portidin yolgha chiqti.  demre tetqiqat saheside ikki ölchemlik burghilash xizmetlirini tamamlighandin kéyin 30 - noyabir antalya portigha qaytip kelgen paraxotning asrash we may ​​qachilash xizmetliri tamamlandi. nöwette sherqiy aqdéngizdiki xzmet sahesi üchün 2021 - yili 15- iyunghiche dawamlishidighan yéngi «Navtex» (déngizchilargha uqturush) élan qilinghandin kéyin  oruch reis antalya portidin yolgha chiqti.

«‹yéngi shepeq› géziti», «türkiyening eng chong urush paraxoti ishlepchiqirishi axiriqi basquchta» serlewhilik xewiride, munu uchurlargha orun ajratti:

türkiyening eng chong urush paraxoti «TCG Anadolu» kéler yili déngizgha sélinidu. «TCG Anadolu» ning uzunluqi 232 métir, kengliki 32 métir kélidu, küreshchi ayropilan, tik uchar we uchquchisiz ayropilan qatarliq 30 ayropilanni élip yüreleydu. bu ghayet zor paraxot zörür tépilghanda minggha yéqin ademni dawalash yardimi bilen teminleydu hemde insanperwerlik yardimi heriketliride doxturxana paraxoti süpitidimu mulazimet qilalaydu.

«‹sabah› géziti», «yerlik litiy bataréyesi kélish aldida» serlewhilik xewiride, munu uchurlargha orun ajratti:

dunyaning herqaysi jaylirida éléktronluq aptomobillarning téz omumlishishigha egiship, bu aptomobillarning bataréyeside ishlitilidighan litiy éléméntigha bolghan éhtiyajmu ashti. taxta kompyutér, téléfon we köchme üsküniler üchün bataréye yasashqa ishlitilidighan litiy, aptomobilning bataréyesidimu ishlitilidu. shenbe küni jumhur reis rejep tayyip erdoghanningmu qatnishishi bilen litiy we uning zapchasliri ishlepchiqirilidighan eskishehir «ETİ» kanchiliq, uchquchluq litiy ishlepchiqirish zawutining échilish murasim ötküzülidu.

«‹weten› géziti», « yawropa ittipaqi türkiyege panahlanghuchilarni qollash üchün 485 milyon yawro yollaydighan boldi» serlewhilik xewiride, munu uchurlargha orun ajratti:

yawropa ittipaqi komitéti 2021 - yili türkiyediki panahlanghuchilarni qollash layiheliri üchün 485 milyon yawro fond ajritidighanliqini élan qildi. yawropa ittipaqi komitéti élan qilghan bayanatida, bu fond arqiliq 1 milyon 800 ming panahlanghuchining éhtiyajining qandurulidighanliqini we 700 mingdin artuq ösmürningmu maaripigha  yardem bérilidighanliqini bildürdi.