21.12.2020

türkiye awazi radiyosi: «‹yéngi shepeq› géziti»,  «chawushoghlu mezlumlarning sadasi bolushni dawamlashturidighanliqlirini éytti» serlewhilik xewiride, töwendiki melumatlarni oqurmenlirining diqqitige sundi:

dölitimiz tashqi ishlar ministiri mewlüt chawushoghlu, «xelqara insanperwerlik hemkarliq küni» munasiwiti bilen élan qilghan bayanatida, türkiyening «wuxen wirusi» basquchidimu dunyaning eng séxi döliti bolush süpiti bilen talapetke uchrighuchilargha yardem qolini sunushni dawamlashturghanliqini tekitlep mundaq dédi: «mezlumlarning sadasi bolushni dawamlashturimiz.»

«‹weten› géziti», «ministir qaraismailoghlu: <xitay éksport paraxotimiz tömür yoli tiransportidiki zepirimizdur> dédi» serlewhilik xewiride, munu uchurlargha orun ajratti:

qatnash we qurulush ishliri ministiri adil qaraismailoghlu, mundaq dédi: «xitay éksport paraxotimiz, istanbulning cherkezköy rayonidin xitayning shien shehirige yétip bérish sepirini  muweppeqiyetlik halda tamamlidi. ötken her bir sheherdin türkiyening arqa sep teminat küchini pütkül jahangha namayen qilghan xitay éksport paraxotimiz, tömür yoli tiransportidiki zepirimizdur.»

«‹sabah› géziti», «türkiye hawa yolliri shirkitidin muhim muweppeqiyet» serlewhilik xewiride, töwendiki bayanlargha orun ajratti:

türkiye hawa yolliri shirkiti türkiyening tunji yerlik mulazimétir we modém ishlepchiqardi. ayropilanlarda؛ médiya mezmunlirini (kino , muzika , ün - sin, gézit, zhurnal qatarliqlar) ni  saqlash, xalighan waqitta torgha chiqish, hemde médiya mezmunlirini yoluchilar bilen ortaqlishishqa bolidighan mulazimétir arqiliq ayropilan sayahiti köngüllük ötidu.

«‹star› géziti», «<tirilish ertughrul> namliq téléwiziye tiyatiridin tesirlirinip, sögütke keldi» serlewhilik xewiride,  töwendiki uchurlarni oqurmenlirining diqqitige sundi:

pakistan döletlik téléwiziye qanilida tarqitilghan we dölette  körürmenlerning qizghin alqishigha érishken «tirilish ertughrul» namliq téléwiziye tiyatiridin tesirlengen pakistanliq üch dost, minglarche kilométirliq musapini bésip, türkiyege keldi, hemde ertughrul ghazining bilejik wilayitining sögüt nahiyesidiki meqberesini ziyaret qildi.

«‹höriyet› géziti», «digitallishish sayahetchiler sanigha ijabiy eks étidu» serlewhilik xewiride, munu uchurlargha orun ajratti:

medeniyet we sayahet ishliri ministiri mehmet nuri ersoyning qurulushi tamamlanghan we zamaniwi layihesi, téxnologiyelik qurulmisi bilen türkiyening reqiblirining aldigha ötüp kétishide türtkilik rol oynaydighanliqi bildürülgen digital supining heriketke keltürülgenlikini uqturushi, sayahet sahesining qizghin alqishigha érishti. türkiye heqqide melumatqa érishish we türkiyege sayahet qilish pilani tüzüshni xalaydighanlargha, döletning medeniyet we sayahet bayliqlirini birlda mulazimet ramkisi astida sunushni nishan qiliwatqan « goturkey.co»  ning, 2021-yildiki zakas ishlirigha ijabiy eks étishi kütülmekte.