14.12.2020

türkiye awazi radiyosi: «‹weten› géziti», «türkiyening sherqiy aqdéngiz we ege déngizidiki heq – hoquqlirini qoghdash iradisi qetiy» serlewhilik xewiride,  töwendiki uchurlarni oqurmenlirining diqqitige sundi:

türkiye dölet mudapie ministirliqi teripidin élan qilinghan bayanatta, türkiyening xelqara qanun we inaq qoshnidarchiliq munasiwetliri terepdari ikenliki tekitlinip mundaq déyildi: «türkiye armiyesining ege déngizida we sherqiy aqdéngizda dölitimiz hem shimaliy qibris türk jumhuriyitining heq – hoquqliri we tüp menpeetlirini jan tikip qoghdash iradisi qetiy bolup, qibris arilida, xelqaraliq kapaletchilik we ittipaqdashliq kélishimlirige asasen, tinchliq we bixeterlikning kapaliti bolushni izchil dawamlashturidu.»

«‹yéngi shepeq› géziti»,  «qarabaghda qayta qurush basquchi» serlewhilik xewiride, töwendiki melumatlargha orun ajratti:

türkiye büyük millet mejlisi türkiye – ezerbeyjan parlaméntlar ara dostluq guruppisining bashliqi shamil ayrim, uda 30 yil ishghal astida qalghan qarabaghda ul- eslihe qurulushi, öy – imaret, mektep, kutubxana, jame we chérkaw qalmighanliqini, hemmisining erméniye teripidin yoq qilinghanliqini tekitlep mundaq dédi: «shunga, bular türk shirketliri teripidin qayta eslige keltürülidu, yéngi olturaq rayonliri we ul eslihe qurulushliri berpa qilinidu.»

«‹star› géziti», «türkiye hemishe ezerbeyjanni qollidi» serlewhilik xewiride, munu uchurlarni  oqurmenlirining diqqitige sundi:

ezerbeyjan diaspora dölet ishliri komitétining muawin mesuli élshad eliyéw, erméniye – ezerbeyjan urushi mezgilide, türkiye diasporasi bilen birlikte dunyaning herqaysi jaylirida türlük paaliyetlerni élip barghanliqlirini tekitlep mundaq dédi: «türkiye barliq pirogrammilirimizda yénimizda boldi. bu sayida nahayiti zor muweppeqiyetlerni qolgha keltürduq. pütkül türkiye diasporasi we chet eldiki türkler we qérindash xelqler idarisigha minnetdarliq bildürimiz hem köptin köp rehmet éytimiz.»

«‹xewer türk› géziti», «tunisqa uchquchisiz hawa apparati éksporti» serlewhilik xewiride, munu uchurlargha orun ajratti:

türkiye awiyatsiye we alem qatnishi sanaiti shirkiti tunis hawa armiyesi qomandanliq ishtabigha, 80 milyon dollarliq 3 dane «enqa» namliq uchquchisiz hawa apparati we 3 dane yer kontrol sistémisi tapshurup béridu. aldimizdiki yillarda bu reqemlerning éshishi kütülmekte. tunisliq 52 uchquchi we rémunt xadimlirimu enqerede türkiye awiyatsiye we alem qatnishi sanaiti shirkiti muesseseliride bilim ashuridu.

«‹sabah› géziti», «dubey – istanbul ayropilan seperliri aridin 9 ay ötkendin kéyin qaytidin bashlinidu» serlewhilik xewiride, munu uchurlarni  oqurmenlirining diqqitige sundi:

merkizi dubeyge jaylashqan Flydubai  shirkiti teripidin bu heqte élan qilinghan bayanatta, «wuxen wirusi» sewebidin uda 9 ay toxtap qalghan dubey – istanbul sabiha gökchen ayrodurumi ayropilan seperlirining 17 – dékabirdin étibaren qaytidin  bashlinidighanliqi, bélet sétish ishlirining bashlanghanliqi uqturuldi.