11.12.2020

türkiye awazi radiyosi: «hörriyet» géziti,  «jumhur reis erdoghanning erméniye signali» serlewhilik xewiride, jumhur reis rejep tayyip erdoghanning ezerbeyjan pirézidénti ilham eliyéw bilen ötküzülgen uchrishishidin kéyinki qoshma muxbirlarni kütüwélish yighinida, rayon tinchliqini kapaletke ige qilish üchün, zörür tépilsa alte terep söhbet supisi teshkil qilishqa bolidighanliqini eskertip, «rusiye, türkiye, ezerbeyjan, iran, giruziye qatarliq döletler, shundaqla qobul qilip tüzümige riaye qilsa erméniyemu bu supidin orun alsa bolidu. bu yönilishte ijabiy qedemler tashlanghan teqdirde, bizmu yépiq ishiklirimizni achimiz. bizning erméniye xelqige öchmenlikimiz yoq. mesile erméniye rehberlik qatlimida. méning dölitimde yüz ming ermen puqrayim bar» dégenlikini oqurmenliri bilen ortaqlashti.

«yéngi shepeq» géziti, «türkiyening qoralliq uchquchisiz hawa apparatliri ezerbeyjanning zeper quchushida muhim rol oynidi» serlewhilik xewiride, ezerbeyjan pirézidénti ilham eliyéwning jumhur reis rejep tayyip erdoghan bilen ötküzgen qoshma muxbirlarni kütüwélish yighinida, türkiyening sanaet tereqqiyati toghrisida toxtilip, «weten (ning ishghal astidiki zéminlirini azad qilish) urushimizda türkiyede ishlepchiqirilghan dangliq bayraqtar qoralliq uchquchisiz hawa apparatliri zor özgirishlerni peyda qildi. bayraqtar bizning muweppeqiyitimizde muhim rol oynidi. pütkül dunya türk xelqining talanti we iqtidarini, türk sanaitining qanchilik tereqqiy qilghanliqini yene bir qétim körüp yetti» dégenlikini yazdi.

«star» géziti, «warank: türkiyeni tötinchi sanaet inqilabining yönilishini belgileydighan döletlerning birige aylandurushqa bel baghliduq (dédi)» serlewhilik xewiride, türkiye sanaet we téxnologiye ishliri ministiri mustapa warankning tötinchi sanaet inqilabi merkizining échilish murasimidiki, «bizning tetqiq qilish – tereqqiy qildurush we yéngiliqchi iqtisadiy sistémimiz, özimizning adem küchi bayliqimiz we échilish murasimini ötküzüwatqan bu xil merkezler sayisida türkiyeni nishanlirigha barghanséri yéqinlashturmaqta. biz türkiyeni tötinchi sanaet inqilabining yüzlinishini belgileydighan döletlerning birige aylandurushqa bel baghliduq» dégen sözlirige orun berdi.

«sabah» géziti, «türkiyege meblegh sélishta gollandiye, amérika we engliye aldinqi qatardin orun almaqta» serlewhilik xewiride, türkiyening 2003 – yilidin buyan sanaettin sermayigiche, énérgiyedin tiransportqiche, kanchiliqtin parche sétishqiche bolghan nurghun sahelerde 165 milyard dollarliq biwasite chet el meblighi jelp qilghanliqini؛ gollandiye, amérika qoshma ishtatliri we engliyening omumiy sélinmining üchtin birini teshkil qilghanliqini yazdi.

«xabertürk» géziti, «xande küden bérlin filarmoniyesige qobul qilinghan tunji türk boldi» serlewhilik xewiride, iskiripkichi xande küdenning bérlin filarmoni orkéstirining resmiy ezaliqigha qobul qilinish arqiliq yéngi sehipe achqanliqini yazdi؛ gézitning xewiride körsitilishiche, 28 yashliq küden bérlin filarmoni orkéstirigha qobul qilinghan tunji türk iskiripka mahiri süpitide hemmini iptixarlanduridighan bir muweppeqiyetni qolgha keltürgen.