09.12.2020

türkiye awazi radiyosi: «weten géziti», türkiye jumhur reisi rejep tayyip erdoghanning istanbulda aridin 86 yil ötkende qaytidin ibadetke échilghan ayasofyai kebir jamesi sherifige hösinxet ramkisi teqdim qilghanliqini xewer qildi.

xewerde bildürülishiche, hösinxetni mehmet özchay yazghan bolup, süre al imranning 159-160- ayetliri yézilghan iken.

«xeber türk géziti», türkiye tashqi ishlar ministiri mewlüt chawushoghluning tünügün (2020-yili 8-dékabir) wéngriye tashqi ishlar ministiri pétér siyyarto (Peter Szijjarto) bilen körüshkendin kéyin bayanat élan qilip, yawropa ittipaqi bilen bolghan mesililerning peqet diyalog we diplomatiye bilen hel bolush mumkinlikini éytqanliqini xewer qildi.

«hörriyet géziti», adalet we tereqqiyat partiyesi(AK Parti)  ning bayanatchisi ömer chelikning bayanat élan qilip, firansiyening üstün qarabagh jumhuriyitini étirap qilghanliqigha qattiq naraziliq bildürgenlikini xewer qildi.

xewerde, ömer chelikning, «firansiye qarabaghning musteqilliqini étirap qildi. üstün qarabaghni étirap qilish dégenlik, u yerdiki ishghaliyetni testiqlidim dégenliktur. bu b d t qararlirigha xilap» dégenliki qeyt qilindi.

«star géziti», sanaet we téxnologiye ministiri mustafa warankning tünügün (2020-yili 8-dékabir) enqerede ötküzülgen «7-nöwetlik türkiye-wéngriye arilashma iqtisadiy komitéti yighini» da, türkiyege ishinip meblegh salghuchilarning kütkendinmu köp menpeetke érishidighan mezgilning yétip kelgenlikini éytqanliqini xewer qildi.

mustafa warankning: «biz üchün chet ellik meblegh salghuchi yoq, karxanichilar bar. kélinglar türk méhmandostluqi bilen tonushunglar, türkiyege meblegh sélinglar» dégenliki qeyt qilindi.

«sabah géziti», ottura sherq pen-téxnika uniwérstéti tetqiqatchiliri tetqiq qilip yasighan radiyatsiye téxnika rakétasining wezipisini muweppeqiyetlik tamamlap, yer sharigha qaytqanliqini xewer qildi.