07.12.2020

 türkiye awazi radiyosi: «‹xewer türk› géziti», «tashqi ishlar ministirliqi: <girétsiye jiddiylikni ashuridighan paaliyetlirini dawamlashturuwatidu> dédi» serlewhilik xewiride, munu uchurlargha orun ajratti:

tashqi ishlar ministirliqi bayanatchisi hami aqsoy, girétsiye metbuatliridiki «türkiye yawropa ittipaqi rehberliri yighinidin ilgiri ege we aqdéngizidiki herbiy paaliyetlirini kücheytti» dégen xewerler toghrisidiki soallargha jawab bérip, bu xewerlerning toghra emeslikini tekitlidi. hami aqsoy: «del eksiche, girétsiye 20 - öktebirdin bashlap ege déngizi we sherqiy aqdéngizda 24 qétim herbiy paaliyet élip baridighanliqini élan qilish arqiliq rayonda ighwagerchilik we jiddiylikni kücheytidighan herbiy paaliyetlirini dawamlashturmaqta. girétsiye türkiye bilen bolghan mesililirini bashqilardin yardem kütüsh bilen emes, belki peqet türkiye bilen üstelde olturush, hemkarliq we diyalog arqiliqla hel qilalaydu» dédi.

«‹hörriyet› géziti», «dölet mudapie ministirliqi 28 herikette 58 térrorchining ujuqturulghanliqini élan qildi» serlewhilik xewiride, dölet mudapie ministirliqining tünügün élan qilghan bayanatida, yéqinqi 1 ay ichide élip bérilghan 28 herikette 58 térrorchining ujuqturulghanliqini bildürgenlikini yazdi.

«‹sabah› géziti»,  «qanuni burghilash paraxoti wezipe ijra qilishqa teyyar» serlewhilik xewiride, énérgiye we tebiiy bayliqlar ministiri fatih dönmezning türkiyege tewe üchinchi burghilash paraxoti qanunining qara déngizda burghilashni bashlashqa teyyar ikenlikini bildürgenlikini yazdi. xewerde, ministir fatih dönmezning tünügün twittérda paraxotning sinliq körünüshini hembehirlep, «qanuni qaynam-tashqinliq qara déngizda burghilash xizmetliri üchün teyyarlanmaqta. tetur sanaq bashlandi» dégenliki qeyt qilindi.

«‹star› géziti», «istanbul ayrodurumi yawropa boyiche uchush qétim sani eng köp ayrodurumgha aylandi» serlewhilik xewiride, munu uchurlargha orun ajratti:

yawropa hawa yolliri bixeterlik teshkilati (EUROCONTROL) ning sanliq melumatigha asaslanghanda, istanbul ayrodurumi 28-noyabirdin 4-dékabirghiche yawropa boyiche uchush qétim sani eng yuqiri ayrodurum bolghan. istanbul ayrodurumidin 28-noyabir 41 , 29-noyabir 542, 30-noyabir 496 nöwetchi ayropilan uchup, yawropaning aldinqi qatardiki ayrodurumlirinmu arqida qaldurghan.

«‹weten› géziti», «fochadiki kütülmigen bayqash, texminen 250 yilliq tarixqa ige» serlewhilik xewiride, türkiye mutexessislirining izmirning focha nahiyesi déngiz tewelikide élip barghan tetqiqatliri jeryanida, 18-esirning axirilirida chöküp ketkenliki texmin qilinghan we zapchasliri keng rayongha tarqalghan urush paraxotini bayqighanliqini hemde paraxotning zadi qaysi dölet teripidin, qandaq meqsette  ishlitilgenlikige  dair sanliq melumatlarni éniqlash üchün tepsiliy tekshürüsh bashlighanliqini yazdi.