16.09.2020

türkiye awazi radiyosi: «‹yéngi shepeq› géziti»,  «türkiye yéngi nawtéks élan qilish arqiliq qorallandurulghan arallargha qarita lozan shertnamisini xatiriletti» serlewhilik xewiride,  töwendiki uchurlarni oqurmenlirining diqqitige sundi:

türkiye nawtéks (déngizchilargha uqturush) élan qilip, 1923 – yilqi «lozan shertnamisi» dairiside «sakiz arili» ning gheyriy herbiy rayon salahiyitining buzulghanliqini bildürdi. girétsiye 1960 – yildin buyan gherbiy herbiy rayon salahiyitige ige arallarni qorallandurup, türkiyening milliy bixeterlikige tehdit shekillendürüwatatti. türkiye arallarning qoralsizlandurulushi üchün atinagha chaqiriqta boluwatatti. shuning bilen bir waqitta, yéngi nawtéks élan qilip, aqdéngizda wezepe ötewatqan «yawuz» namliq tetqiqat paraxotining mudditining 12 – öktebirgiche uzartilghanliqini uqturdi.

«‹star› géziti», «chawushoghlu ‹girétsiye yawropa ittipaqining qarighularche qollishigha ishenmisun› dédi» serlewhilik xewiride, töwendiki melumatlargha orun ajratti:

tashqi ishlar ministiri mewlüt chawushoghlu, türkiyening girétsiyening sherqiy aqdéngizgha munasiwetlik mesililerde söhbet ötküzüshke teyyar ikenlikini bildürüp mundaq dédi: «girétsiyening yéngi hökümitining söhbet ötküzüsh chaqiriqimizgha ijabiy jawab qayturushini ümid qilimen. bu nuqtida, girétsiyeni, türkiye bilen diyalog orntishtin qéchip, yawropa ittipaqining qarighularche qollishigha ishinishining, saqliniwatqan mesililerning aldidiki eng chong tosalghu  ikenliki toghruluq agahlandurimen.»

«‹weten› géziti», «yawropa ittipaqi türkiye bilen zitliship saqliniwatqan mesililerni hel qilghili bolmaydighanliqini bildürdi» serlewhilik xewiride, munu uchurlarni  oqurmenlirining diqqitige sundi:

yawropa parlaménti omumiy kéngishi yighinida, türkiyening sherqiy aqdéngizda dawamlashturuwatqan tetqiqat paaliyetliri muzakire qilindi, yawropa ittipaqi tashqi munasiwetler we bixeterlik ishliri siyasiti aliy wekili josép borél, yighinda qilghan sözide, türkiyening sherqiy aqdéngizda nopuzining zoriyiwatqanliqini, jümlidin, eslidiki küchige qaytidin érishkenlikini tekitlep mundaq dédi: «türkiye bilen zitliship, saqliniwatqan mesililerni hel qilghili bolmaydighanliqi hemmige besh qoldek ayan.»

«‹höriyet› géziti»,  «türkiye 2021-yili eng téz qeddini ruslighan döletler qataridin orun alidu» serlewhilik xewiride, töwendiki uchurlarni oqurmenliri bilen ortaqlashti:

soda ishliri ministiri ruhsar pekjan, «wuxen wirusi» ning yer shari xaraktérlik iqtisadqa körsitiwatqan tesiri dawamlishiwatqan bir peytte, türkiyening köpligen döletlerge sélishturghanda ehwalining közge körünerlik derijide yaxshi ikenlikini, hemde ijabiy jehettiki perqining barghanséri zoriyiwatqanliqini tekitlep mundaq dédi: «bu yil axiri étibari bilen, bolupmu 2021 – yili tashqi bazarlirimizdiki shert – sharaitlarning téximu yaxshilinishigha egiship, tesiri eng küchlük we eng téz qeddini ruslighan döletler qataridin orun alidighanliqimizni mölcherlewatimiz.»

«‹sabah› géziti», «türkiye eng muweppeqiyetlik 3 dölet qataridin orun aldi» serlewhilik xewiride, munu uchurlargha orun ajratti:

türkiye, sanaet mehsulatlirini ishlepchiqirishta % 4.4 lik éshish bilen, érlandiye, norwégiye we xitaydin kéyin 4 -, ayliq nisbette 8.4 lik éshish  bilen, portugaliye we ispaniyedin kéyin 3 – retke tizildi. sanaet mehsulatlirini ishlepchiqirish körsetküchini arqimuarqa ikkinchi charektimu dawamlashturup, «wuxen wirusi»  basquchi harpisidiki sewiyedin halqighan türkiyede, 3-charektimu yuqiri éshish kütülmekte.