17.01.2020

türkiye awazi radiyosi: «<hörriyet> géziti», «jumhur reis erdoghan: pütkül imkaniyitimizni jenubimizdiki jughrapiyening muqimliqi üchün seperwer qilishni dawamlashturimiz (dédi)» serlewhilik xewiride töwendiki uchurlarni oqurmenliri bilen ortaqlashti: jumhur reis rejep tayyip erdoghan, tünügün beshtepe millet qurultay we kültür merkizide chaqirilghan «2019 – yili muhakime yighini» da söz qilip, «liwiyediki qanunluq hökümetning mewjutluqini dawamlashturushi üchün, bu döletke eskirimizni ewetimiz» dédi we sözini dawamlashturup, «türkiyening bixeterlikining chégralirining sirtida bashlinidighanliqi tonushini chiqish qilghan halda, siyasiy, soda, insaniy, diplomatik we herbiy jehettiki pütkül imkaniyitimizni jenubimizdiki jughrapiyening muqimliqi üchün seperwer qilishni dawamlashturimiz» dégenlerni qeyt qildi.

«<sabah> géziti», «ministir dönmez yerlik aptomobil toghrisida toxtaldi» serlewhilik xewiride töwendiki uchurlarni oqurmenlirining diqqitige sundi: énérgiye we tebiiy bayliqlar ministiri fatih dönmez, tünügün «yerlik tokluq aptomobillar bilen birlikte 2030 – yilida türkiyede 1 milyondin artuq tokluq aptomobilning bolushini texmin qiliwatimiz» dédi.

«<weten> géziti», «ministir albayraq: 2020 de yéngi utuq hékayisi yazimiz (dédi)» serlewhilik xewiride töwendiki melumatlargha orun berdi: xezine we maliye ishliri ministiri berat albayraq tünügün tiwittér adrésida uchur tarqitip, «tarixning eng chong tashqi péréwot hujumlirining tesirini yoqitip tashliduq. barliq körsetküchlerde nishanlirimizdin halqighanliqimizni namayan qilduq. inshaallah 2020 de barliq organlirimiz bilen, iqtisadimizda yéngi bir utuq hékayisi yazimiz» dégenlerni qeyt qildi.

«<yéngi shepeq> géziti», «chet eldiki sayahetlerge 2019 – yilining (aldinqi) 9 éyida 3 milyard 400 milyon dollar serp qilindi» serlewhilik xewiride, türkiyedin 2019 – yilining yanwar – séntebir ayliri arisida chet elge chiqqan türkiye puqraliri sanining bir aldinqi yilning oxshash mezgilige sélishturghanda %11.9 éship, 6 milyon 530 ming 388 din 7 milyon 411 ming 702 ademge yetkenlikini, bu mezgilde 3 milyard 380 milyon 213 ming dollar pul serp qilinghanliqini yazdi.

«<star> géziti», «türk waksinisi rakni dawalash üchün özgertilip tereqqiy qildurulmaqta» serlewhilik xewiride, ikkinchi dunya urushi mezgilide türkiyede yasalghan chéchek késelliki waksinisining özgertilip, yéqinqi yillarda yuqiri bahagha érishiwatqan, rak bimarlirining immonét sistémisini küchlendürüsh arqiliq késellikke taqabil turushni nishan qilghan asasliq dorilarning birige aylandurulush basquchini bashtin kechürüwatqanliqi toghrisidiki uchurlarni oqurmenliri bilen ortaqlashti.