04.09.2019
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «sabah géziti», türkiye dölet mudapie ministiri hulusi akarning 2020-2019-yilliq uchush telim-terbiye yili échilish murasimigha qatnishish üchün izmirdiki chighli 2-hawa armiye qomandanliq merkizige barghanliqini we murasimda amérika bilen dawamlishiwatqan bixeterlik rayon xizmetliri üstide toxtalghanliqini xewer qildi.
gézitning xewiride, hulusi akarning: «bizge bérilgen wedilerni yéqindin közitiwatimiz. bérilgen wedilerni her qandaq shekilde aqsitish bolsa yaki orundalmisa-armiyemizning, türkiye jumhuriyiti dölitining ikkinchi, hetta üchinchi pilani bar, ularni ijra qilishqa teyyarmiz» dégenliki qeyt qilindi.
«weten géziti», maliye ministiri berat albayrakning awghust éyida pul paxalliqida közge körünerlik derijide töwenlesh körülgenlikini bildürüp: «ishlepchiqarghuchi baha indéksidiki töwenlesh, pul paxalliqini chüshürüwatidu. pul paxalliqigha qarshi küresh we iqtisadiy éshish, aldin ehmiyet béridighan siyasetlirimiz bilen, barliq sahelerde yil axiridiki nishanimizgha yétimiz» dégenlikini xewer qildi.
«hörriyet géziti», türkiye hawa yolliri shirkiti istanbul ayrodurumidin engliye, irélandiye, rusiye, norwégiye, shiwétsiye, daniye, finlandiye, latoniye, litwaniye we éstoniyediki 26 nuqtigha bérish-kélish 164 dollardin bashlinidighan étibar bahada bélet sétish paaliyitini bashlighanliqini xewer qildi.
xewerde bildürülishiche, 2019-yili 3-13-séntebir künliri arisida bélet sétiwalghan kishi uchush waqtini 2019-yili 3-séntebirdin 2020-yili 20-mayghiche uzartalaydiken.
«star géziti», türk awiyatsiye we alem sanaiti shirkiti tereqqiy qildurghan «chaqmaq téz süretlik nishan ayropilan sistémisi» ning, tunji qétim chet elde ishlitilidighanliqini élan qildi.
xewerde, «chaqmaq téz süretlik nishan ayropilan sistémisi» ning, 11-séntebirde bashlinidighan «2019-herbiy hemkarliq» manéwirda ishlitilish üchün, qazaqistangha apirilidighanliqi qeyt qilindi.
«xeber türk géziti», tünügün (3-séntebir) aydinning kushadasi nahiyesige üch paraxotta jemiy 4 ming 230 sayahetchining kelgenlikini élan qildi.
