05.07.2017

sabah géziti, «b d t bundaq setchilikke imza qoyalmaydu» serlewhilik xewiride munularni yazdi:

jumhur reis rejep tayyip erdoghan birleshken döletler teshkilatining térrorluq teshkilati y p g/p k k bilen qol astidiki ösmür qoralliqlarni qoyup bérish bahanisi astida uchrishish ötküzüp, kélishim imzalishini qetiy qobul qilghili bolmaydighanliqini bildürüp: «b d t ning bir térrorluq teshklatini bu shekilde étibargha élishi, muzakire üstilide olturushi we xuddiy resmiy qanunluq salahiyet bériwatqandek kélishim imzalishi, eng yénik ipade bilen bir setchiliktur.  b d t bundaq setchilikke imza qoyalmaydu» dédi.

sitar géziti, «türkiye b d t ning jenwe ishxanisigha we shiwéyitsariye dairilirigha naraziliq notasi tapshurdi» serlewhilik xewiride munulargha orun ajratti:

türkiye térrorluq teshkilati p k k/ y p g/ p y d ning kontirolluqi astidiki atalmish s y g teshkilatining qomandani p k k gha eza térrorchi bilen heriket pilani kélishimi imzalighan b d t ning jenwe ishxanisigha shundaqla térrorchilarning dölitige kirishige ruxset qilghan shiwéyitsariye dairilirigha naraziliq notasi tapshurdi.

yéngi shepeq géziti, «türkiye yashash we xizmet qilish jehettin eng yaxshi 7 - dölet boldi» serlewhilik xewiride munu uchurlarni ortaqlashti:

«HSBC» guruhining «Expat Explorer» namliq ray sinas jedwélide, türkiye yashash we xizmet qilish jehettin dunya boyiche eng yaxshi 7 - dölet bolup saylandi. türkiye gérmaniye we ereb birleshme xelipilikinimu arqida qaldurup qoydi. türkiyediki chet ellik xizmetchilerning %62 i türkiyening turmush sewiyesining öz döletlirige sélishturghanda yuqiri örligenlikini bildürdi. %60 i bolsa, öz döletlirige sélishturghanda, türkiyediki soda –sanaet, xizmet we xususiy turmush tengpungluqining téximu yaxshi ikenlikini bildürdi. 

xeber türk géziti, «dunya türkiyening gélemlirini tallidi» serlewhilik xewiride munu uchurlarni oqurmenlirining diqqitige sundi:

türkiyedin yilning deslepki 6 éyida 177 döletke 1 milyard 176 milyon dollarliq gélem éksport qilindi. ikésport qilinghan döletler arisida 282 milyon dollarliq gélem sétiwélish bilen amérika birinchi, 210 milyon dollarliq gélem sétiwélish bilen seudi erebistan ikkinchi, 57 milyon dollarliq gélem sétiwélish bilen gérmaniye üchinchi we 45 milyon dollarliq gélem stiwélish bilen iraq 4–boldi. ulardin qalsila ret boyiche engliye, liwiye, misir, birleshme ereb xelipiliki, iran, kuweyt, israiliye we bélgiye qatarliq döletler türkiyening eng yaxshi gélem baziri boldi.

weten géziti, «pamukkalede rékort yaritildi» serlewhilik xewiride munularni yazdi:

dénizlining alemshumul shöhretke ige sayahet merkizi pamukkale yilning deslepki 6 éyida 1 milyon sayahetchini kütüwélish bilen rékort yaratti. aldinqi yilning oxshash mezgilige sélishturghanda, sayahetchilerning sanida %23 lik éshish körüldi. yilning axirigha qeder pamukkalege 2 milyon 800 ming sayahetchining kélishi mölcherlenmekte.