24.06.2019

türkiye awazi radiyosi: «<hörriyet> géziti», «jumhur reis erdoghan: istanbulgha xeyrlik bolsun (dédi) serlewhilik xewiride, jumhur reis, qoshumche adalet we tereqqiyat partiyesi bashliqi rejep tayyip erdoghanning, yéngidin ötküzülgen istanbul sheherlik hökümet bashliqi saylimi netijilirining istanbul üchün xeyrlik bolushini tilep, gheyriy resmiy netijilerge asasen saylamda ghelibe qilghan ekrem imamoghluni tebrikligenlikini yazdi.

xewerde körsitilishiche erdoghan, «buningdin burunqigha oxshashla aldimizdiki musapidimu démokratiyening, qanunning üstünlüki؛ tinchliq, muqimliq we bayashatliq üchün, birlik we barawerlik ichide 2023 nishanlirigha qarap ilgirileymiz» dégen.

«<yéngi shepeq> géziti», «parlamént bashliqi shentop: milliy irade yene bir qétim namayan boldi (dédi)» serlewhilik xewiride, mejlis (parlamént) bashliqi mustafa shentopning, 23 – iyun saylamlirida türkiyediki démokratik takamulluq we milliy iradining yene bir qétim namayan bolushi bilen axirlashqanliqini éytqanliqini yazdi.

gézitining xewiride körsitilishiche, shentop tiwittér adrési arqiliq bayanat bérip, «démokratiye, milliy iradining saghlam we barawer muhitta tejelli qilishi bilen, bu jehette ikkilinishke qetiy yol qoymaydighan ochuq – ashkara saylamlarning ötküzülüshi bilen put tirep turidu. millitimiz istanbul üchün tallishini otturigha qoydi, xeyrlik bolsun. bu munasiwet bilen istanbul sheherlik hökümet bashliqliqini qolgha keltürgen hörmetlik ekrem imamoghluni tebrikleymen؛ istanbulgha xeyrlik xizmetlerni qilishini ümid qilimen» dégen.

«<star> géziti», «mursining oghli abdullah erdoghangha rehmet éytti» serlewhilik xewiride, misirda sot zalida hayatidin ayrilghan, döletning démokratik saylam arqiliq hakimiyet béshigha kelgen tunji pirézidénti muhemmed mursining ailisining, bashta jumhur reis rejep tayyip erdoghan bolup özlirini yalghuz tashlap qoymighan barliq kishilerge rehmet éytqanliqini yazdi.

gézitining xewiride körsitilishiche, dunya miqyasida milyonlarche kishining atisi üchün ghayibane jinaza namizi ötigenlikige isharet qilghan abdullah, «tarix bundaq bir weqege shahit bolmidi» dégen.

xewerde, abdullahning yene, «hemmeylenge, xususen hörmetlik erdoghangha, qatar emri sheyx temim bin hemed al sani we uning atisigha, malayshiya hökümitige we tunisning sabiq pirézidénti munsif elmerzuqiygha rehmet éytimiz» dégenliki qeyt qilindi.

«<weten> géziti», «térrorluq teshkilatigha éghir zerbe (bérildi), san köpeymekte» serlewhilik xewiride, iraqning xakurk rayonida dawamlishiwatqan penche herbiy herikitini öz ichige alghan shimaliy iraqtiki zerbe bérish heriketliride bir terep qilinghan térrorchilar sanining 96 ge yetkenlikini yazdi.

gézitning xewiride, 27 – mayda bashlanghan xakurk rayonidiki izdesh we charlash xizmetlirini dawamlashturuwatqan komandirlar, p k k teripidin ishlitiliwatqan 8 éghizliq bir öngkürni bayqighanliqi, u yerde tekshürüsh élip bérish arqiliq köp sanda qoral we ularning oq – doriliri bilen köp miqdarda turmush lazimetliklirini qolgha chüshürgenliki qeyt qilindi.

«<yéngi shepeq> géziti», «antalya, nopusidin ikki hesse köp sayahetchini kütüwaldi» serlewhilik xewiride, sayahetchilikning paytexti antalyagha bu yil 22 – iyulghiche hawa yoli arqiliq kelgen sayahetchiler sanining 4 milyon 943 ming 637 ge yetkenlikini yazdi.

gézitining xewiride körsitilishiche, dunyaning eng muhim sayahet merkezlirining biri bolghan sheher, 5 yérim ayda nopusining texminen ikki hessisige teng kelgüdek chet ellik sayahetchini kütüwalghan, sheherge bu yilning deslepki 5 yérim éyida 180 dölettin sayahetchi kelgen.

xewerde qeyt qilinishiche, ötken yili 14 milyon etrapida chet ellik sayahetchini kütüwalghan 2 yérim milyon nopusluq antalyaning, 2019 – yilida yéngi rékortlarni yaritishi texmin qilinmaqta iken.

«<hörriyet> géziti», «türkiye hawa yolliri shirkiti filosigha yéngi ayropilanlar qétilidu» serlewhilik xewiride, türkiye hawa yolliri shirkitining filosigha ayrbas 350-900 tipliq ayropilandin 30 dane, boyéng 787-9 tipliq ayropilandin 30 dane qoshidighanliqini yazdi.

gézitning xewiride, «chüsh ayropilan» dep atilidighan boyéng 787-9Dreamliner tipliq ayropilanning birinchisining 25 – iyunda, üchining iyul, qalghan ikkisining awghust aylirida türkiye hawa yolliri shirkitining filosigha qétilidighanliqi bildürüldi.

xewerde körsitilishiche, boyéng 787-9 tipliq tunji ayropilan 8 – iyulda istanbuldin antalyagha qatnaydiken. 2020 – yilidin bashlap filodiki ornini alidighan türkiye hawa yolliri shirkitining ayrbas 350 tipliq ayropilanlirining birinchisi aldimizdiki yilning mart éyida shirketke tapshurup bérilidiken.

«<sabah> géziti», «ipek soylu portugaliyede chémpiyon boldi» serlewhilik xewiride, türk choyla top mahiri ipek soyluning Foz International Ladies Open musabiqiside zeper quchqanliqini yazdi.

xewerde, ipek soyluning hel qilghuch musabiqide meydangha chüshken kanadaliq 3 – nomurluq katérina sébowni 6 ge qarshi 7؛ 7 ge qarshi 6؛ 3 qarshi 6 lik netijiliri bilen yéngip, portugaliyening figuéra da foz shehiride longqigha érishkenliki qeyt qilindi.

gézitining xewiride körsitilishiche, portugaliyediki ghelibisidin sirt bu mewsumda ikkisi misir, biri taylandta bolup jemiy üch qétim chémpiyon bolghan mahir tenheriketchi, bu qétimqisi qoshulghanda kespiy hayatida 12 – qétim ghelibe qazanghan.