29.05.2019

türkiye awazi radiyosi: «sabah géziti», türkiye jumhur reisi rejep tayyip erdoghanning télégramma élan qilip istanbul pethi qilinghanliqining 566-yilliqini tebrikligenlikini xewer qildi.

xewerde, jumhur reis rejep tayyip erdoghanning 1453-yili istanbul pethisining bir dewrni axirlashturup, yéngi bir dewrni achqanliqini, siyasiy, ijtimaiy we medeniyet qatarliq jehetlerdiki netijiliri bilen dunya tarixining éqimini özgertkenlikini hemde tarixning eng shanliq zeperliridin biri bolghanliqini bildürgenliki qeyt qilindi.

xewerde, rejep tayyip erdoghanning, «istanbul fatih sultan mehmetning keng qorsaqliq we adalet bilen hakimiyet yürgüzüshi bilen, oxshimighan étiqad we medeniyetler birlikte yashaydighan merkez haligha keldi» dégenliki eskertildi.

«xeber türk géziti», türkiye armiyesining shimaliy iraqtiki hakurk rayonida bölgünchi térrorluq teshkilati p k k gha eza térroristlar uwa tutqan jaylargha herbiy heriket bashlighanliqini xewer qildi.

xewerde, quruqluq armiye zembirekliri we hawa armiye ayropilanlirining bombardimanliri bilen bashlanghan heriketke alahide zerbidarlar birigadiliriningmu qatnashqanliqi bildürüldi.

xewerde, «penje herbiy herikiti» ning, hakurk rayonida térrorluq teshkilatining ghar, öngkür we oq-dora iskilatlirini bitchit qilish hemde térroristlarni yoqitishni meqset qilghanliqi bildürüldi.

«yéngi shepeq géziti», türkiye armiyesi tünügün (29-may) kechte quruqluq we hawadin bashlighan herbiy heriketning dawamlishiwatqanliqini xewer qildi.

xewerde, térrorluq we xewpsizlik mutexessisi abdullah aghar alahide terbiyelengen zerbidarlar qatnashqan bu herbiy heriketning ijra küchlirige qarighanda uzungha sozulush mumkinliki toghrisida uchur bergenliki qeyt qilindi.

abdullah aghar: «bu herbiy heriket peqet térroristlarni yoqitish menisige ige emes. intayin muhim bir mezgilde nahayiti muhim rayonda <meydan hakimiyiti> qurush menisige ige. penje herikitining qandilgha sozulmasliqi üchün héchqandaq seweb yoq.  buni waqitning ötüshi bilen köreleymiz» dégen.

«weten géziti», türkiye bilen xitay otturisida siyasiy munasiwetlerning tereqqiy qilishigha parallél halda xitaydin türkiyege mebleghlerning téz sürette éshiwatqanliqini xewer qildi.

xewerde, énérgiye, astiqurulma, bankachiliq qatarliq nurghun sahelerde türkiyege meblegh sélishni üzmey dawamlashturuwatqan we yéngi sélinmiliri bilen, munasiwetlik tekshürüshlirini élip barghan xitaydin türkiyege «meblegh sélishni dawamlashturimiz» dégen signalning kelgenliki qeyt qilindi.

xewerde, xitay tashqi ishlar ministirliqining xitay-türkiye ishlirigha mesul muawin mudiri chyen minjyen waqitning ötüshi bilen nurghun xitay shirketlirining türkiyege meblegh salghanliqi qeyt qilindi.

«hörriyet géziti», istanbul soda-sanaetchiler birleshmisining «türkiyening 2018-yilliq 500 chong sanaet shirkiti tetqiqat» netijilirini élan qilghanliqini xewer qildi.

xewerde bildürülishiche, türkiye néfit ayrish zawutliri tüprash (TÜPRAŞ) türkiyening eng chong sanaet shirkiti bolghan. ford ikkinchi, toyota üchinchi bolghan.