03.04.2019

türkiye awazi radiyosi: «sabah géziti», tebiiy apet we jiddiy ishlargha taqabil turush idarisi bilen türk qizilay jemiyitining idai quyun apiti yüz bergen mozambikta, öy-makanidin ayrilip qalghanlargha yardem qilghanliqini xewer qildi.

gézitning xewiride, tebiiy apet we jiddiy ishlargha taqabil turush idarisi xadimlirining mozambiktiki tebiiy apetning eng éghir ziyinigha uchrighan bériya shehiri etrapida «chédir kent» qurghanliqi؛ türk qizilay jemiyitining öy-makanidin ayrilip qalghan 233 ailige yémek-ichmek yardimi qilghanliqi bildürüldi.

«hörriyet géziti», isirailiye paytexti tél awiwdin mughlaning bodrum nahiyesige ayropilan sepirining bashlanghanliqini xewer qildi.

gézitning xewiride, milas-bodrum ayrodurumida tél awiwdin pesil xaraktérlik tunji ayropilan sepiri bilen kelgen yoluchilarning, güldestiler bilen kütüwélinghanliqi bildürüldi.

eskertilishiche, 180 yoluchi koréndon (Corendon) hawa yolliri bilen kelgen bolup, ayrodurumdin chiqqanda tatliq türüm we güldestiler bilen kütüwélinghan.

«yéngi shepeq géziti», 2019-yilining deslepki üch éyida antalyagha kelgen chet ellik sayahetchiler sanining ötken yili (2018) ning oxshash mezgilige sélishturulghanda %25 éship, 571 ming 207 ge yetkenlikini xewer qildi.

gérmaniyelikler antalyagha kelgen chet ellik sayahetchiler ichide birinchi orunda turidighan bolup, rusiyelikler ikkinchi orunda turghan. 2019-yilida antalya üchün nishan qilinghan chet ellik sayahetchi sani 15 milyondin 16 milyongha chiqirilghan, yerlik sayahetchi sanini 5 milyongha yetküzüsh nishan qilinghan.

«star géziti», xelqara géografik sayahetchiler (National Geographic Traveler) ning fotografchiliri we dangliq blogérlar (blogger) ichidin orun alghan sekkiz kishilik jenubiy koréyelik guruppining, adiyaman shehiridiki tarixiy we sayahet nuqtilirini kézip chiqqanliqini xewer qildi.

xewerde, guruppining b d t maarip, bilim we medeniyet teshkilati-yunésko (UNESCO) ning dunya medeniyet mirasi tizimlikige kirgüzülgen nemrut téghi, perre qedimki shehiri, kona kahta qelesi, jendere köwrüki, arsémiya ören yeri we qaraqush tümülsini qatarliq jaylarni ziyaret qilghanliqi bildürüldi.

«weten géziti», istanbuldiki yawuz sultan selim köwrükining yalghuzluq késili bémarliri üchün alahide xatirilinidighan 2-aprél küni kechte kök nur bilen yorutilghanliqini xewer qildi.