17.10.2018

türkiye awazi radiyosi: «yéngi shepeq géziti», türkiye jumhur reisi rejep tayyip erdoghan adalet we tereqqiyat partiyesi (AK Parti)ning türkiye parlaméntidiki guruppa yighinida, amérikani süriyening munbich rayonigha orunlashturghan bölgünchi térrorluq teshkilati p k k ning gumashtisi p y d|y p g térroristlirini chiqirish mesiliside bergen wediside turushqa chaqirghanliqini xewer qildi.

gézitning xewiride, rejep tayyip erdoghanning türkiye-amérika otturisidiki 4-iyun hasil qilinghan pikir birlikini xatiriletken halda: «munbich toghrisida 90 künlük heriket pilani bar idi, epsus heriket pilani emelge ashmidi. firatning sherqi üchünmu oxshash usul küchke ige. biz özimizning ishini özimiz qilimiz, eng yuqiri sewiyede qedem tashlaymiz. bularning hemmisi dölitimizning xatirjemliki üchünla emes, belki u rayonda yashawatqan xelqlerning xatirjemliki üchündur» dégenliki eskertildi.

«hörriyet géziti», türkiye tashqi ishlar ministiri mewlüt chawushoghlu munbich heqqide amérikagha keskin signallarni bergenlikini xewer qildi.

xewerde, amérikaning qollishi bilen süriyening munbich rayonigha makanlashqan bölgünchi térrorluq teshkilati y p g| p k k ni rayondin chiqirish mesiliside, amérika bilen hasil qilinghan pikir birliki üstide toxtalghan mewlüt chawushoghluning: «munbich mesiliside amérikaning keynige tartiwatqanliqini hés qilsaq, burunqi meydanimizgha qaytimiz, amérikagha ya siler tazilanglar, yaki biz tazilaymiz deymiz» dégenliki qeyt qilindi.

«xeber türk géziti», türkiye istatistika idarisi (TÜİK) ning 2018-yil awghust ayliq sanaet ishlepchiqirish nisbitini élan qilghanliqini xewer qildi.

sanliq melumatlargha asaslanghanda, 2018-yilning awghust éyida sanaet ishlepchiqirish nisbiti 2017-yilning oxshaesh mezgilidikige sélishturghanda %1.7 ashqan.

«weten géziti», türkiye mudapie sanaitining eng chong éksport layihesidin biri bolghan pakistanning déngizda may qachilash paraxoti (PNFT) ning pakistan déngiz armiyesige tapshurup bérilgenlikini xewer qildi.

igilinishiche, paraxotning saetlik eng yuqiri tézliki 20 déngiz mili, égizliki 158 métir, kengliki 22 métir, tonnazhi 15 ming 600 tonna iken. kéche-kündüz tik ucharning herikitini köziteleydighan iqtidari bar bolup, pakistan déngiz armiyesi paraxotqa «PNS MOAWIN» dep nam bergen.

«star géziti», özbékstan milliy uniwérstétining nobél mukapatigha érishken türk alim eziz sanjargha pexri doktorluq unwani bergenlikini xewer qildi.

piroféssor doktor eziz sanjar özbékstan milliy uniwérstétida özining sheripige «eziz sanjar: bilimning cheksizlikide bir hayat» témisida ötküzülgen xelqaraliq ilmiy muhakime yighinigha qatnashqan. u yighinda söz qilip: «bilim bolmay turup, hörmetke érishelmeymiz. buni türk dunyasi birlikte tiriship emelge ashuralaydu. birlikte tirishishimiz intayin muhim. tilimiz, dinimiz we yiltizimiz oxshash. biz birlikte tirishsaq chong ishlarni royapqa chiqiralaymiz, bilim bilen zor küch bolalaymiz» dégen.