18.07.2018

türkiye awazi radiyosi: "sabah géziti", ötken hepte bélgiye paytexti biryussélda ötküzülgen nato aliy rehberler yighinida, amérika pirézidénti trampning eza döletlerning rehberliridin mudapie chiqimini köpeytish heqqide wede alalmay qattiq ghezeplengenlikini xewer qildi.

xewerde körsitilishiche, pirézidént tramp dölitimiz jumhur reisi rejep tayyip erdoghanni buning sirtida tutqan we uninggha qarighiniche: "erdoghan buning sirtida, u ishlarni toghra usulda qiliwatidu" dégen.

"star géziti", türkiye awiyatsiye we alem sanaiti shirkiti urush ayropilani telim-terbiye we yéqindin qollash ayropilanini tereqqiy qildurush layihesi daireside layiheligen "hürzhét" ning, engliyediki körgezmide diqqet qozghighanliqini xewer qildi.

"sabah géziti", türkiyeni bixeter "port" süpitide köridighan chet ellik meblegh salghuchilarning "saqlap-körüsh" weziyitidin halqip, qayta öy-zémin sétiwélishqa yüzlengenlikini xewer qildi.

buninggha asaslanghanda, öy baha indéksi iyun éyida markiliq öy layihelirining %10 i chet ellik meblegh salghuchilargha sétilghan.

"weten géziti", yawropadiki her qaysi döletlerde yashawatqan türklerning yilliq dem élishlirini ana wetinide élish üchün yolgha chiqqanliqini؛ buning tesiride, kapikule chégra éghizidin 37 ming 138 yoluchining ötüp, rékort yaritilghanliqini xewer qildi.

"yéngi shepeq géziti", 27-iyul kech saet 20 din 10 minut ötkende ay tutulidighanliqini we 5 saet 40 minut dawamlishidighanliqini xewer qildi.