türkiye metbuatlirida bügün 12.07.2014

türkiye awazi radiyosi xewiri: «‹xewer türk› géziti» «erdoghanning yoli» serlewhilik xewiride, bash ministir rejep tayyip erdoghanning jumhur reislik namzatliqi üchün hazirlanghan «istiratégiyelik nishan» pilanini élan qilghanliqini yazdi. gézit, yéngi türkiye üchün erdoghanning istiratégiyelik nishan pilanining menbesi bolghan üch asasi piripsipning diplomatik siyaset, ochuq jemiyet we qanun dölitidin teshkil tapidighanliqini oqurmenliri bilen ortaqlashti. gézitning xewiride, erdoghanning nishanliri arisida türkiyeni dunya boyiche aldinqi qatarda turidighan qudretlik döletlerdin birige aylandurush ikenliki tekitlendi.
«‹yéngi shepeq› géziti», «israiliyege qattiq agahlandurush» serlewhilik xewiride, jumhur reis abdullah gülning israiliyening pelestinge qarshi quruqluq hujumi élip bérishqa teyyarliniwatqanliqidin xewerdar ikenlikilirini, qetiy bundaq qilmasliqi toghruluq israiliyeni qattiq agahlandurghanliqini yazdi. gézit, birleshken döletler teshkilati we xelqaraliq teshkilatlarni zimmisige yüklengen wezipisini ada qilishqa chaqirghan abdullah gülning, türkiye - israiliye munasiwetlirining normallishishi üchün aldi bilen bu hujumlargha xatime bérilishining zörürlükini tekitligenlikini eskertti.
«‹sitar› géziti», «aridin 19 yil ötkendin kéyin ikkinchi qétimliq widalishish» serlewhilik xewiride, insaniy tiragédiye yüz bergen sirébrénitsa qirghinchiliqida hayatidin ayrilghan 175 boshnaqning jinaza murasimining derd - elemlerni hessilep ashuruwetkenlikini yazdi. gézit, 1994 - yili sérblar yürgüzgen qirghinchiliqta qetle qilinghan boshnaqlarning jinazisi üchün potochorida mazarlarning échilghanliqi, qurbanlarning yéqin - yoruqlirining köz yashliri ichide dua qilghanliqini oqurmenliri bilen ortaqlashti. gézitning xewiride, engiliye bilen gérmaniyening sirébrénitsa qirghinchiliqi munasiwiti bilen qoshma bayanat élan qilip, yawropada qanche on yil misli körülüp baqmighan bir qirghinchiliqning yüz bergenlikini, bundaq tiragédiyening qayta yüz bérishining aldini élishning zörürlükini tekitligenliki qeyt qilindi.
«‹sabah› géziti», aqdéngizde ispaniye, girétsiye, malta, italiye, kirodiye we qaradagh qatarliq döletlerde port ishlitiwatqan türkiye déngizchiliq shirketlirining yéngi köz nurining skandinawiye ikenlikini yazdi. gézit, shiwétsiyede ikki portni biraqla höddige alghan yildirim guruhi shirkitining emdilikte norwégiyening eng chong portliridin birini höddige alghanliqini oqurmenliri bilen ortaqlashti. gézitning xewiride, déngizchiliqta közge körünerlik netijilerni qolgha keltürüwatqan türkiye déngizchiliq shirketlirining nishanliri arisida afriqa we latin amérika portlirini ishlitishmu barliqi, türkiye shirketlirining on yil ichide dunyaning eng chong déngizchiliq shirketliri qataridin orun alidighanliqi qeyt qilindi.
«‹weten› géziti», kambirij ayal kinezi kéyt midiltonning qiz qérindishi pippaning istanbulgha kélidighanliqini we istanbul boghuzidin üzüp ötidighanliqini yazdi. gézit, pippaning ewerest téghida hayatidin ayrilghan taghchi üchün fondi jemiyitige iane toplaydighanliqini we bu meqsette istanbulgha kélip, mushu ayning axirliri « Bosphorus Cross-Continental Race ‹boghazichi qiteler ara su üzüsh musabiqisi›» ge qatnishidighanliqini oqurmenliri bilen ortaqlashti. gézitning xewiride, musabiqining 20 - iyul küni ötküzülidighanliqi eskertildi.