11.07.2014

türkiye awazi radiyosi: «weten géziti», «36 saette 400 tonna bomba» serlewhilik xewiride, isirailiye armiyesining herbiy heriket bashlighan deslepki ikki künde ghezzege 400 tonnidin artuq bomba tashlighanliqini élan qildi.
gézit, isirailiyening 2012 – yili sekkiz kün dawamlashqan herbiy herikitidimu, nishanlarning 36 saet boyiche bombardiman qilinghanliqini eskertti.
«yéngi shepeq géziti», isirailiye ghezzege hawa we déngizdin hujum bashlighandin kéyin, islam hemkarliq teshkilati ijraiye komitétining seudi erebistanning jidde shehiride toplanghanliqini xewer qildi.
xewerde, türkiyege wakaliten yighingha qatnashqan muawin bash ministir emrullah ishlerning, isirailiyeni ghezzeni jazalash meqsitide bashlighan hujumlirini derhal toxtitishqa chaqirghanliqi qeyt qilindi.
xewerde, bash ministir rejep tayyip erdoghanning isirailiyening hujumigha duch kelgen ghezzege jiddiy yardem qilish yolyoruqi bergenliki tekitlendi.
bash ministirlik mehkimisidin élinghan melumatlargha asaslanghanda, bash ministir rejep tayyip erdoghanning yolyoruqi bilen, muawin bash ministir emrullah ishlerning qol astidiki türk hemkarliq teshkilati (TİKA), ghezzege tézlikte yémek – ichmek we dora yardimi qilidighanliqini élan qilghan.
«axsham géziti», «iqtisadiy tereqqiyat we hemkarliq teshkilati (OECD) texmini reqemni %3.3 ge chiqardi» serlewhilik xewiride, her ikki yilda bir qétim élan qilinidighan türkiye iqtisadigha munasiwetlik doklatta, teshkilatning türkiyening bu yilqi iqtisadiy tereqqiyat texmini körsetküchini %3.3 ge chiqarghanliqini élan qildi.
xewerde, may éyida élan qilinghan iqtisadiy éshish doklatida, bu reqemning %2.8 bolghanliqi eskertildi.
xewerde, iqtisadiy tereqqiyat we hemkarliq teshkilatining 2015 – yili üchün belgiligen türkiye iqtisadining %4 ashidighanliqigha munasiwetlik texmini reqemni özgertmigenliki eskertildi.
«sabah géziti», merkiziy engliyege jaylashqan bir meslihetchilik shirkitining tetqiqatigha köre, igilik tikligüchilerning nisbiti eng yuqiri yawropa döliti türkiye bolup, dunyada ikkinchi orunda turidighanliqini qeyt qildi.
«xeber türk géziti», «besh ayda 15 milyon sayahetchi» serlewhilik xewiride, türkiyening eng muhim sayahet shehiri bolghan antalyada sayahetchilik ishlirining heriketlinishke bashlighanliqini qeyt qildi.
gézitning xewiride, hawa témpératurisining issishi bilen, sayahetchiler sanining ashqanliqi eskertildi.
xewerde, bu yilning deslepki besh éyida antalyagha kelgen sayahetchiler sanining ötken yilning oxshash mezgilidikige sélishturghanda ashqanliqi, 2013 – yilining deslepki besh éyida antalya ayrodurumigha kelgen yoluchilar sanining 14 milyon 942 ming 545 ikenliki, bu yilning deslepki besh éyida bolsa, 15 milyon 177 ming 712 ge yetkenliki bildürüldi.
«milliyet géziti», tenterbiye sehipiside, argéntina – gollandiye yérim hel qilghuch musabiqiside répérliq qilghan jüneyt chakirning, hazirdin bashlapla yéngi nishanini belgilep bolghanliqini xewer qildi.
xewerde, jüneyt chakirning 2018 – yili rusiyede ötküzülidighan dunya longqisi hel qilghuch musabiqiside répérliq qilish üchün tirishchanliq körsitidighanliqi eskertildi.