10.07.2014

türkiye awazi radiyosi xewiri: «‹yéngi shepeq› géziti», «oqutquchilirinimu untup qalmidi» serlewhilik xewiride, jumhur reis namzati we bash ministir erdoghan jumhur reis namzati süpitide ete istanbulda élan qilidighan istiratégiyelik pilanning teyyarliq xizmetlirining dawamlishiwatqanliqini yazdi. gézit, türkiyening her sahe zatlirini uchrashturidighan yighinigha erdoghanning siyasiy sehnidiki sepdashliridin sirt yene 30 oqutquchisi, mehelle dostliri, 7 rayondin 70 karxanichi, marmaray, istanbul 3 - ayrodurumi qatarliq chong - chong layihelerning énzhinérliri we ishchi - xizmetchilirining wekilliriningmu ishtirak qilidighanliqini oqurmenliri bilen ortaqlashti.
«‹milliyet› géziti», «ghezzening ölük baliliri» serlewhilik xewiride, israiliye armiyesining ghezzege qaratqan hawa hujumlirida ikki kün ichide hayatidin ayrilghanlarning sanining 50 tin éship ketkenlikini, yüzlerche kishining yarilanghanliqini yazdi. qaza qilghanlar arisida onlarche nariside bala we ayallarningmu barliqini eskertken gézit, 2000 - yildin béri ölüp ketken pelestinlik balilarning sanining 1407 ge yetkenlikini xewer qildi.
«‹sabah› géziti», «iqtisadiy uchur» sehipisidiki «abalioghlu guruhi amérika qoshma ishtatlirida zawut quridu» serlewhilik xewiride, denizli abalioghlu guruhining, amérikida tunji zawutini quridighanliqini yazdi. gézit, 42 milyon dollarliq meblegh sélinip qurulidighan mis quymichiliq zawutining 300 kishige ishqa orunlishish pursiti yaritip béridighanliqini oqurmenliri bilen ortaqlashti. gézit, amérikining niyu méksiko ishtatidiki sente térizé rayonigha jaylashqan sanaet baghchisida qurulushi pilanliniwatqan muessesening texminen 24 ming kiwadrat métirliq sahede qurulidighanliqini eskertti. gézitning xewiride, zauwtning 2015 - yili ish bashlaydighanliqi qeyt qilindi.
«‹sitar› géziti», «65 ming kishini kütüwalidu» serlewhilik xewiride, öy jahazliri we yaghach pishshiqlap ishlesh mashiniliri, öy jahazliri we ormanchiliq sanaiti saheliride türkiye we dunyaning lider shirketlirining uchrishish nuqtisi bolghan yaghach pishshiqlap ishlesh mashiniliri körgezmisining 27 - séntebirdin 1 - öktebirgiche bolghan ariliqta istanbulda ötküzülidighanliqini yazdi. gézit, bultur 30 dölettin 880 karxana we karxana wekilliri ishtirak qilghan körgezmining, bu yil % 12 tereqqiy qilip, 14 zalda échilidighanliqini oqurmenliri bilen ortaqlashti. gézitning xewiride, 30 din artuq dölettin minggha yéqin karxana we karxana wekillirining ishtirak qilishi mölcherliniwatqan körgezmining öz sahesidiki barliq özgirishler we yéngiliqlarning tunji adrési bolidighanliqi tekitlendi. gézit, körgezmining 90 dölettin 65 mingdin artuq ziyaretchini kütüwalidighanliqini qeyt qildi.
«‹ weten› géziti», «éksport qiliniwatqan 100 aptomobildin 73 ti yawropa ittipaqigha» serlewhilik xewiride, türkiye aptomobil sanaiti sahesining éksportining, bu yilning deslepki yérimida yawropa ittipaqi bazarlirida bulturqining oxshash mezgildikige sélishturghanda közge körünerlik derijide tereqqiy qilghanliqini yazdi. gézit, bultur yanwardin iyulghiche bolghan ariliqta aptomobil éksportining % 69.20 tining yawropa ittipaqi bazarlirigha qarita ishqa ashurulghanliqi, buning bu yilning oxshash mezgilde % 73.80 ge yetkenlikini oqurmenliri bilen ortaqlashti.
«‹ axsham› géziti», «tangojular hel qilghuch musabiqige qatnishish salahiyitige érishti» serlewhilik xewiride, dunya longqisini talishish putbol musabiqiside gollandiye komandisini jaza topliri bilen yenggen messi isimlik dangliq mahirgha ige argéntina komandisining hel qilghuch musabiqige qatnishish salahiyitige érishkenlikini yazdi. gézit, türkiyelik jüneyt chaqirning musabiqe boyiche yüksek sewiyediki we adil tirénérliq xizmiti tüpeyli hemmining alqishigha sazawer bolghanliqini oqurmenliri bilen ortaqlashti.