09.07.2014

yéngi shepeq géziti «qetliam yolida erkinlik yürüshi» serlewhilik xewiride, sirébrénitsada 19 yil ilgiri 12mingdin artuq boshnaqning sirp zulumidin yalang ayaq qachqan «ölüm yolida» dunyaning her qaysi döletliridin kelgen minglarche ademning yürüsh qilghanliqini bildürdi. gézit 10-nöwetliki ötküzülgen tinchliq yürüshi üchün bir yerge jem bolghan 5000 ademning her küni texminen 35 kilométir yol basqanliqini oqurmenliri bilen ortaqlashti. gézit tinchliq yürüshining 11-iyulda potocharidiki xatire munarida axirlishidighanliqini yazdi.
sitar géziti «ghezze oq astida» serlewhilik xewiride, israiliyening iordan deryasining gherbiy qirghiqida 3 yehudiy köchmen yashning jesiti tépilghandin kéyin ghezzege hujum qilghanliqini uqturdi. gézit israiliye ayropilanlirining hujumlirida deslepki melumatlargha köre 20 pelestinlikning ölgenlikini yazdi. xewerde ereb elliri ittipaqining birleshken döletler teshkilatini jiddiy yighin ötküzüshke chaqirghanliqi qeyt qilindi.
hürriyet géziti oxshash xewerni «israiliye tirik qalqanlargha hujum qildi» serlewhisi astida élan qilip, israiliye bilen hamas arisidiki sürkilishning yuqiri pellige yetkenlikini yazdi. gézit islami jihat we hamas teripidin étilghan rokétlargha qarshi isriliyening ghezzede 150 yerge zerbe bergenlikini uqturdi. xewerde türkiyening israiliyedin ghezzege hujum qilishni axirlashturushni telep qilghanliqi qeyt qilindi.
aksham géziti, iqtisad ishliri ministiri nihat zeybekchining yanwardiki yaponiye ziyaritide bash ministir rejep tayyip erdoghan we yaponiye bash ministiri abéning yolyoruqi bilen küntertipke kelgen iqtisadi hemkarliq kélishimi toghruluq pirinsip jehettiki muzakirilerning axirlashqanliqini éytqanliqini yazdi. gézit muzakirilerning nahayiti ongushluq ötkenlikini éytqan zeybekchining ikki dölet arisidiki munasiwetlerni kücheytidighan kélishm üstide pat yéqinda muzakire bashlinidighanliqini éytqanliqini uqturdi.
star géziti «yip bilen pütülgen tunji quran kerim jinis dunya rékortigha namzat» serlewhilik xewiride, süriyelik muhemmed maher hadrining yiplar bilen rext üstige 12 yil ichide ishlep chiqqan qurani kerimning istanbul bashakshehir nahiyelik hökümet teripidin körgezmige qoyulghanliqini oqurmenliri bilen ortaqlashti. gézit dunyada yiplar bilen pütülgen tunji qurani kerim bolush alahidilikige ige we uzunluqi 80, kengliki 60 santimétir, her bir tomining 15 kilogram kélidighan eserning jinis dunya rékorti kitabigha namzat bolghanliqini yazdi.
hürriyet géziti, türkiyening égiz binalarning köplüki jehettin yawropadinmu éship ketkenlikini we 141 égiz bina bilen yawropa qiteside eng köp égiz binalar bolghan dölet bolghanliqini uqturdi. gézit 100 métirdin égiz binalar kirgüzülgen tizimlikte ikkinchi qatarda 116 égiz binalar bilen rusiyening orun alghanliqini bildürdi.
sabah géziti tenterbiye sehipiside élan qilghan «némislar biraziliyeni tarix sehipisige kömdi» serlewhilik xewiride, gérmaniye döletlik putbol komandisining biraziliyeni nahayiti chong perq bilen yéngip 2014-yilliq dunya longqisi putbol musabiqisida hel qilghuch musabiqe oynash pursitige érishkenlikini yazdi. gézit musabiqining 11-minutida mullérning bir top atqanliqini, uzungha barmayla gérmaniye putbol cholpanlirining arqa-arqidin 5 top kirgüzgenlikini qeyt qildi. xewerde ikkinchi meydan musabiqide gérmaniye putbol cholpanlirining yene 2 top kirgüzüp biraziliyeni 0 ge qarshi 7 netije bilen yéngip zor utuq qazanghanliqi bildürüldi.