06.07.2014

hürriyet géziti «parizhda perqliq türkiye obrazi» serlewhilik xewiride, firansiyede yerlik toqumuchiliq shirketlirini bir yerge jem qilghan «nöwet kimde» namliq parizh moda yermenkisi ötküzülgenlikini, bu yilqi sherep méhmini türkiye bolghan yermenkige türkiyedin wakko, özlem suer we mehtap élaydigha oxshash 50ge yéqin shirketning qatnashqanliqini yazdi. gézit yermenkige oxshimighan döletlerdin 2000ge yéqin toqumuchiliq shirkitining qatnashqanliqini oqurmenliri bilen ortaqlashti.
milliyet géziti «junggodin türkiyege büyük layihe» serlewhilik xewiride, junggo hökümitining uyghur rayonidin türkiyege sozulidighan téz süretlik poyiz liniyisi üchün 150 milyard dollar ajratqanliqini yazdi. gézit junggoning eng chong parawuz we wagon ishlepchiqarghuchisi bolghan chong guruhning bashliqi jaw shiyaw yangning uyghur rayonidin bashlinidighan 6000 kilométir uzunluqidiki téz süretlik poyizning qirghizistan, tajikistan, özbékistan, türkmenistan, iran we türkiyegiche sozulidighanliqini éytqanliqini bildürdi.
aksham géziti bir xewiride, türkiye bilen yawropa ittipaqi otturisida hazirghiche köwrüklük roli oynap kéliwatqan xelqara déplomatlar birliki yillardin buyan ishlep kéliwatqan xizmetlirining méwisining körülüshke bashlighanliqini yazdi. gézit xelqara déplomatlar birlikining üch yil ilgiri iltimas qilghan birleshken döletler teshkilati iqtisadiy we ijtimaiy kéngesh ezaliqigha qobul qilghanliqini, birlikning türkiyening yawropa ittipaqi ezaliqidin sirt qibris mesilisi, firansiyediki atalmish ermeniy qirghinchiliqi qanun layihesi, yawropadiki islamgha qarshi düshmenlik we gérmanyede öltürülgen türkler qatarliq mesililerde xizmet élip bérip alaqide teqdirleshke érishkenlikini uqturdi.
sitar géziti «1 milyon yerlik sayahetchi dem élishini 15 künge sighdurdi» serlewhilik xewiride, türkiye sayahet agéntliqliri uyushmisi 2014 türkiye sayahet pesli doklatini élan qilip, kéyinki yillarda ramzan éyining sayahet peslining del otturisida kélishi netijiside yerlik sayahetchilerning ikkige bölüngenlikini, yerlik sayahetchining 28%ning, yeni 1 milyon yerlik sayahetchining 15-iyundin 15-iyulghiche sayahet qilghanliqini bildürdi. xewerde, sayahet sahesidiki ikkinchi basquchluq janlinishning ramzan éyi bashlighan 27-iyul bilen oqush bashlinidighan 15-séntebir künliri arisidiki 6 heptilik waqitta ishqa ashidighanliqi qeyt qilindi.