xitay üchturpanda yüz bergen yer tewreshte ölüm-yétimning azliqini ilgiri sürdi

türkiye awazi radiyosi xewiri: xitay yer tewresh tori merkizi (CENC) tewresh merkizi aqsu wilayiti üchturpan nahiyesining 50 kilométir gherbide 7.1 bal yer tewrigenlikini élan qilghan idi.

yerlik menbelerdin élinghan uchurlargha asaslanghanda, qirghizistan we qazaqistan chégrasigha yéqin taghliq rayondiki yamansu yézisida yüz bergen yer tewreshte, deslepki éniqlashlargha qarighanda, üch kishi jénidin ayrilip, besh kishi yarilanghan. qirghizistan we qazaqistan chégrasi boyiche sozulghan tengri téghining étekliride, nopusi shalang bolghan yer tewresh merkizige 20 kilométir kélidighan besh yéza köp weyranchiliqqa uchrighan.

bildürülishiche, apet rayonida 47 öy örülüp chüshken bolup, 120 din artuq nurghun parnik we mal qotanliri buzghunchiliqqa uchrighan.

rayondiki yer tewresh idarisining bashliqi jang yongjyu yer tewreshning déngiz yüzidin 3 ming métir égizlikke jaylashqan, nopusi shalang bolghan jayda yüz bérishining, apetning buzghunchiliq tesirini azaytqanliqini eskertip: «7.1 bal shiddetlik yer tewresh hésablinidu, emma ölüm-yétim we yarilanghanlar köp emes» dédi.

bu qétimqi yer tewresh aqsu shehiridin bashqa, qeshqer, xoten we ürümchi qatarliq sheherlerde, uyghurlargha qoshna qirghizistan, qazaqistan we özbékistan qatarliq döletlerdimu hés qilinghan.