guba shehiri «türk döletliri teshkilati yéza igilik paytexti» dep élan qilindi

türkiye awazi radiyosi xewiri: ezerbeyjan yéza igilik ministiri mejnun memmedowning sahibxanliqida chaqirilghan yighingha türk döletliri teshkilati bash katipi, bash elchi qubanichbék ömüraliyéw, türkiye déhqanchiliq we ormanchiliq ishliri ministiri ibrahim yumaqli, özbékistan yéza igilik ministiri eziz woitow, shimaliy qibris türk jumhuriyiti yéza igilik we tebiiy bayliqlar ministiri hüseyin chawush shundaqla qirghizistan yéza igilik ministirliqining birinchi muawin ministiri murat ramatow we qazaqistan yéza igilik ministirliqining muawin ministiri abilxabir tamabék qatarliqlar qatnashti.

ministirlar yighindin kéyin xitabname we axbaratqa bayanat berdi.

ezerbeyjan yéza igilik ministiri memmedow: «ezerbeyjan terep bolush süpitimiz bilen, biz eza döletlerge türk döletlirining yekke reqemlik yéza igilik sanliq melumat supisi qurush, TDT markisi astida yéza igilik we yémeklik mehsulatlirini ortaq ishlepchiqirish qatarliq pikir we tekliplirimizni sunduq we bu yönilishte tetqiqat élip bérish toghrisida kélishtuq.

biz yene türk döletliri teshkilatigha eza döletlerde yéza igilik paytexti élan qilish tüzümini yolgha qoyushni tewsiye qilduq. nöwet bilen, her yili bir sheher türk döletliri teshkilati yéza igilik paytexti dep élan qilinidu. bu yighinda biz ezerbeyjanning guba shehirini türk döletliri teshkilati yéza igilik paytexti dep jakarliduq» dédi.

ministir yumaqli muxbirlarni kütüwélish yighinida bayanat bérip, yighinda imkaniyetlik sijil yéza igiliki, öz - özige tayinish we yémeklik bixeterlikige kapaletlik qilishni meqset qilghan mesililerning muzakire qilinghanliqini bildürdi.