eliyéw: bizning nishanimiz qayta hasil bolidighan énérgiye

türkiye awazi radiyosi xewiri: ezerbeyjan pirézidénti ilham eliyéw: «bizning hazirqi nishanimiz qayta hasil bolidighan énérgiye» dédi.

u ereb birleshme xelipilikining paytexti ebuzabida ötküzülgen «imkaniyetlik sijilliq heptiliki» ning échilish murasimida qilghan sözide, qayta hasil bolidighan énérgiye bayliqining muhimliqini tekitlep, ezerbeyjanning bu sahede zor yoshurun küchi barliqini, shunga qayta hasil bolidighan énérgiye bayliqini échish arqiliq éksportni köp xillashturup, muhit asraydighan iqtisad kespini barliqqa keltüridighanliqini bayan qildi.

u ezerbeyjanning qayta hasil bolidighan énérgiye yoshurun küchini tilgha élip: «quruqluqta 27 gigawat shamal we quyash énérgiyesi, azad qilinghan zéminimizda 10 gigawat shamal we quyash énérgiyesi , kaspiy déngizining ezerbeyjan rayonida 157 gigawat shamal küchi bar. shunga, bizde 200 gigawat etrapida qayta hasil bolidighan énérgiye yoshurun küchi bar. biz éksport liniyesige mohtaj. biz bu türlerning hemmisini qedemmuqedem yolgha qoyuwatimiz» dédi.

u tünügün (15-yanwar) ereb birleshme xelipilikining masdar shirkiti bilen ezerbeyjan dölet néfit shirkiti sokar (SOCAR) otturisida 4 gigawatliq shamal we quyash énérgiyesi éléktr istansisi qurush toghrisida kélishim imzalanghanliqini bildürdi.

u mundaq dédi:

«bu hazirche qisqa muddetlik layihe. ottura mezgillik layihelerning netijiside, tok 10 gigawatqa yetküzülidu. bu emelge ashurghili bolidighan layihe. bizning pilan-layhelirimizmu teyyar. masdar bilen bolghan hemkarliqimiz ezerbeyjanni intayin muhim yéshil énérgiye éksport qilghuchi döletke aylanduridu.»

ezerbeyjanning xelqara énérgiye shirketliri bilen imzalighan kélishimliri netijiside, texminen 22 gigawat shamal we quyash énérgiyesi ishlepchiqirilidighanliqini eskertip: «ezerbeyjanda nahayiti aktip meblegh sélish muhiti bar, biz néfit we tebiiy gaz sahesige zor meblegh jelp qilduq, hazir bizning nishanimiz qayta hasil bolidighan énérgiye. bizning chong pilanlirimiz bar, muweppeqiyet qazinidighanliqimizgha ishinimen» dédi.