ezerbeyjan-erméniye qisimliri chégrada keskin toqunushti

türkiye awazi radiyosi xewiri: ezerbeyjan dölet mudapie ministirliqi tünügün (2022-yili 12-séntebir) kechte erméniye armiyesining chégradiki deshkesen, kelbejer we lachin yönülüshliride keng kölemlik ighwagerchilik qilghanliqini élan qildi.

ezerbeyjan dölet mudapie ministirliqining bu heqtiki bayanatida, erméniye armiyesining basargecher, istisu, karakilise we gorus wilayetliridiki nuqtiliridin ezerbeyjan armiyesining dashkesen, kelbejer we lachin wilayetliridiki bezi jaylargha minamiyot qatarliq oxshimighan qorallar bilen toxtimay bombardiman qilghanliqi؛ netijide eskerler arisida ölüm-yétim ehwalining körülgenliki we herbiy bazilarning buzghunchiliqqa uchrighanliqi eskertildi.

bayanatta, ezerbeyjan armiyesiningmu erméniye armiyesining hujumini toxtitish we toqunushning kéngiyip kétishining aldini élish üchün zörür tedbirlerni alghanliqi, ighwagerchilik heriketlirige qatnashqan erméniye armiyeside ölüm-yétim körülgenlikini we herbiy baziliriningmu buzghunchiliqqa uchrighanliqi qeyt qilindi.

bayanatta, toqunush we buningdin kélip chiqqan aqiwetlerge pütünley yériwan hakimiyitining jawabkar ikenliki tekitlendi.

bayanatta yene, erméniyening ighwagerchiliklirige jawab süpitide élinghan tedbirlerning yerlik xarakétirige ige ikenliki we herbiy nuqtilargha qaritilghanliqi, ezerbeyjan armiyesining erméniye zéminlirini bombardiman qilghanliqi toghrisidiki xewerlerning toghra emesliki bildürüldi.