yéqinqi mezgildiki türkiye - özbékistan munasiwetliri

türkiye jumhuriyiti muawin jumhur reisi fuat oktayning özbékistangha qilghan ziyariti dairiside yéqinqi mezgildiki türkiye - özbékistan munasiwetliri

abdresul ishaqow 

2021-yili, 6-ayning 27-küni, türkiye jumhuriyiti muawin jumhur reisi fuat oktay, 6-nöwetlik türkiye-özbékistan hökümetler ara birleshme iqtisadiy komitéti yighinigha qatnishish üchün özbékistanda ziyarette boldi. tashkentte fuat oktayni özbékistan muawin bash ministiri serdar umurzakow qarshi aldi.

muawin jumhur reis fuat oktay, 28-iyun küni, tashkentte özbékistan pirézidénti shewket mirziyoyéw bilen körüshti. körüshüshte, ikki dölet bashliqlirining bu yil özara ziyaretliride küntertipke kélidighan mesililer muzakire qilindi. 2-nöwetlik türkiye-özbékistan istiratégiyelik aliy hemkarliq kéngishi yighinining özbékistanda jumhur reis rejep tayyip erdoghanning ishtirak qilishida ötküzülüshi pilanlanmaqta. özbékistan pirézidénti shewket mirziyoyéwning bolsa, türk kéngishi bashliqlar yighinigha qatnishish üchün türkiyege kélishi kütülmekte.

körüshüshtin kéyin, oktay bilen umurzakowning riyasetchilikide, 6- nöwetlik türkiye-özbékistan hökümetler ara birleshme iqtisadiy komitéti yighini ötküzüldi. yighin axirida, tereplerning 58 mesilide birdeklik hasil qilghanliqi bildürüldi.

ziyaret dairiside, tashkentte 250 karxanichining ishtirak qilishida özbékistan-türkiye soda – iqtisad munbiri yighini ötküzüldi. fuat oktay bilen serdar umurzakow ishtirak qilghan yighinda, 679 milyon dollar qimmitidiki 25 kélishim imzalandi.

fuat oktay özbékistandiki türk karxanichilar bilenmu körüshüp, ularning mesililirini anglidi. u, semerqend we buxara sheherlirini ziyaret qilghandin kéyin, türkiyege qaytti.

2019-yili ikki dölet bashliqliri teripidin soda sommisini 5 milyard dollargha yetküzüsh nishanigha, 2022-yili yétilishi kütülmekte. yéqinqi bir yérim yil ichide, özbékistanda 500 din artuq türk shirkiti quruldi. islam kerimow dewride her xil sewebler bilen bezi kishiler teripidin qolgha chüshürülgen türk shirketlirining mal-mülükliri qayturulmaqta. türkiye bankiliri özbékistanda shöbe achmaqta. türkiye soda ministiri aprélda özbékistanda ziyarette boldi. 2021-yili, 7-mart küni, semerqentte türkiyening bash konsulxanisi resmiy échildi. mayda özbékistanning antalyadiki pexriy konsuli teyinlendi. özara ayropilan seperliri istanbuldin özbékistandiki sekkiz nuqtigha ishqa ashurulushqa bashlandi.

aldinqi yili, türkiye dölet mudapie ministiri xulusi aqar özbékistanda ziyarette bolghan, türkiye we özbékistan dölet mudapie ministirliqliri otturisida herbiy pul-muamile hemkarliq kélishimi we neq pul yardem bérish kélishim layihesi imzalanghanidi. mirziyoyéw  mezkur kélishimni ötken yili martta testiqlidi. 2021-yili, 23-marttin 27-martqiche, tirmizda özbékistan-türkiye birleshme herbiy manéwiri ötküzüldi. yéqin kelgüside ikki dölet mudapie sanaiti mehsulatlirini ortaq ishlepchiqirish küntertipke kélishi mumkin.

türk kéngishige eza bolghan özbékistan, aldinqi heptilerde türkiy tilda sözlishidighan döletler parlamént ezaliri mejlisige eza bolidighanliqini bildürdi. andin, özbékistanning türksoygha eza bolushimu eng qisqa waqit ichide ishqa ashidu. 2021-yili, 6-ayning 24-küni, özbékistanda ötküzülgen türk kéngishige eza döletlerning 6-nöwetlik sayahet ministirliri yighinida, qoqend shehiri, «türk dunyasining sayahet paytexti» élan qilindi.

yighip éytqanda, türkiye-özbékistan munasiwetliri eng ünümlük mezgilni bashtin kechürmekte. türkiye bilen özbékistan otturisidiki munasiwetlerning yüksek sewiyede dawamlishishi, «türk dunyasi munasiwetliriningmu tereqqiy qilishi» dégen uqumni bildüridu.