qirghizistan pirézidénti özbékstanni ziyaret qildi

türkiye awazi radiyosi xewiri: qirghizistan pirézidénti soronbay jeenbékow resmiy ziyaret üchün yétip kelgen özbékstan paytexti tashkentte pirézidént shewket mirzayéw bilen körüshti.

ikki rehberning ayrim uchrishishi we heyetler ara ötküzülgen uchrishishidin kéyin, ikki dölet otturisida yashlar siyasiti, ishchilar uyushmiliri, bilim-téxnika, tamozhna, maliye-iqtisad saheliri we jiddiy ehwallarda hemkarliq ornitish teklip qilinghan kélishimler imzalandi. buningdin bashqa, 2018-yilidin 2021-yilliri arisida soda-iqtisad, bilim-téxnika we insaniy sahelerde özara hemkarliq ornitishqa munasiwetlik «hökümetler ara hemkarliq pirogrammisi» imzalandi.

mirzayéw bilen jeenbékow ortaq xitabnamigimu imza qoydi. imza murasimidin kéyin, ötküzülgen ortaq axbarat élan qilish yighinida, özbékstan pirézidénti mirzayéw mundaq dédi:

«bu, ikki dölet pirézidéntlirining üchinchi qétim körüshüshi bolup hésablinidu. körüshüshlirimizde muhim mesililerni muzakire qilip, hel qilduq. bügünki ayrim uchrishishimiz we heyetler ara ötküzülgen uchrishishta, her ikki döletning nurghun mesililerdiki qarashlirining bir-birige yéqin ikenlikini bilduq. jeenbékow pirézidént bolup saylanghandin kéyin, resmiy ziyaretliridin birini özbékstandin bashlidi. bizning shanliq ötmüshimiz bar. elwette, ortaq kélechikimizmu bolidu.bu yil ikki dölet otturisidiki tashqi soda omumiy sommisi tunji qétim 250 milyon dollargha yetti, biz bu reqemni yilliqi 500 milyon dollargha chiqirishni nishan qilduq, buning üchün qolimizdin kélidighan barliq tirishchanliqlarni körsitimiz.»

mirzayéw sözide, ikki dölet otturisida yéqinqi mezgillerde muhim mesililerning hel qilinghanliqini, bezi chégra éghizlirining aridin uzun waqit ötkendin kéyin échiwétilgenlikini eskertip: «waqti kelgende ikki dölet otturisida chégralar bolmaydu, biz bir küni buninggha yétimiz, chünki biz tili, dini we yiltizi oxshash bolghan xelqlermiz» dédi.

mirzayéw ikki dölet otturisida awiyatsiye seperliri bilen tömür yol qatnishini köpeytish, aptobus qatnishini bashlash mesiliside pikir birliki hasil qilghanliqlirini؛ özbékstan-qirghizistan-xitay tömür yolining yasilishining ikki döletkila emes, belki rayon döletlirigimu paydiliq ikenlikini؛ bu layihe emelge ashqanda ottura asiyaning qatnash-tiransiport sahesidiki yoshurun küchining téximu ashidighanliqini qeyt qildi.

qirghizistan pirézidénti jeenbékow yéqinqi yillarda ikki dölet munasiwetlirining téz sürette ilgiriligenlikini, nurghun mesiilerning hel qilinghanliqini, bu yil (2017) tunji qétim dölet chégra kélishimining imzalanghanliqini we chégra éghizlirining özara échiwétilgenlikini bildürdi. jeenbékow: «biz ikki dölet chégrasini dostluq, hemkarliq we yaxshi qoshnidarchiliq chégrasigha aylandurduq» dédi.

qirghizistan pirézidénti jeenbékow özbékstan-qirghizistan-xitay tömür yol qurulushini qollashning we ikki dölet otturisida aptobus qatnishini bashlashning ehmiyitini tekitlep, özbékstan bilen qilinghan muzakirelerning qérindashliq muhitida ötkenlikini eskertti.

jeenbékow sözini axirlashturup, ikki dölet munasiwetlirining tereqqiyatigha qoshqan töhpisi munasiwiti bilen, qirghizistanning aliy ordénliridin biri bolghan «danakar ordéni» ni mirzayéwgha teqdim qildi.