ezerbeyjanda yüsüf xas hajip heqqide xelqaraliq ilmiy liksiye yéghini chaqirildi

türkiye awazi radiyosi xewiri: ezerbeyjanning seki shehiride xelqara yüsüf xas hajipni xatirilesh ilmiy liksiye yéghini ötküzüldi.

ezerbeyjan medeniyet we sayahet ishliri ministirliqi, türk dunyasi medeniyet teshkilati, ehmed yesiwi uniwérsitéti, seki waliy mehkimisi we ezerbeyjan milliy kütübxanisining hemkarliqida chaqirilghan xelqaraliq ilmiy léksiye yighinigha dölet erbapliridin bashqa yene nurghun sanda akadémikler qatnashti.

ehmed yesiwi uniwérsitéti mutewelli heyiti bashliqi piroféssor doktor musa yildiz échilish nutiqida, yüsüf xas hajipning türk dunyasida, türk yüksek eqlining shekillinishide tarixqa öchmes iz qaldurghan ulugh zat ikenlikini éytti. qutadghu bilikning hem bir siyasetname, hem bir nesihetname ikenlikini, yusuf xas hajip qaldurghan bu alemshumul shah eserde yalghuz dunyaning saaditila emes, belki islam eqidisi boyiche axiret saaditiningmu etrapliq anglitilghanliqini tekitlendi.

qutadghu bilikning yene ilim – penge ehmiyet bérishni tekitleshtek muhim alahidilikke ige ikenliki üstidimu toxtilip, «ulugh dinimiz islamning tünji yolyuruqi <oqu!> déyish bilen bashlanghan. peyghember eleyhissalammu barliq sözliride insanlarni ilimge righbetlendürgen. yüsüf xas hajipmu öz esiride bilimni tekitleydu. uning qarishiche bilim bir meshel idi» dédi.

piroféssor doktor musa yildiz: «türk dunyasida yüz bériwatqan échinishliq ishlar, türk dunyasining milliy kültürini asas qilghan halda bir – birige téximu bek baghlinishi lazimliqini körsitip bermekte. shunga ewladlirimizgha buninggha oxshash eserlerni téximu yaxshi ögitishimiz we tonutishimiz lazim» dégenlernimu sözlirige ilawe qildi.

türk dunyasi medeniyet teshkilati muawin bash katipi piroféssor doktor firat purtasmu sözide, qirghistan, qaziaqistan, türkmenistan we özbékistanning musteqilliqini tebrikleydighanliqini, türk dunyasi medeniyet teshkilati bolush süpiti türk dunyasidiki barliq döletlerni tonutush üchün her xil paaliyetlerni uyushturiwatqanliqini éytti. dunyaning hemmila yéride dégüdek iqtisadi we ijtimaiy mesililerning yüz bériwatqanliqini tekitlep, «shuni xushalliq bilen éytalaymizki, türkiy xelqlerning qelb birliki we kültür ortaqliqi üchün intayin güzel paaliyetlerni uyushturiwatimiz. kültür jehettiki hemkarliqimiz muqim halda dawamlashmaqta. buning bashqa sahelerdimu tereqqiy qilghan halda dawamlishidighanliqigha ishinimiz» dédi.  

xelqara yüsüf xas hajipni xatirilesh ilmiy liksiye yéghinida yene ezerbeyjanliq meshhur yazghuchi ramiz eskerning «qutadghu bilikning bibliyografiyesi» namliq kitabi tonushturuldi we nurghun sanda ataqliq akadémikler qutadghu bilik heqqide teyyarlap kelgen léksiyelirini sözlidi.