uyghur jamaet erbabi abdulqadir yapchan nazaretke élindi
yéngi shepeq géziti, istanbulda istiqamet qiliwatqan uyghur jamaet erbabi abdulqadir yapchanning 40 künlük nazaretke élinghanliqini xewer qildi.
türkiye awazi radiyosi xewiri: türkiyede chiqidighan «yéngi shepeq» géziti, 15 yildin buyan türkiyede istiqamet qiliwatqan uyghur jamaet erbabi abdulqadir yapchanning bakirköy sulhi jaza sot mehkimisi teripidin 40 künlük nazaretke tashlanghanliqini xewer qildi.
gézitning xewirige qarighanda, béyjing dairiliri teripidin xitayni parchilashqa orunush bilen eyiblinip kéliwatqan tonulghan jamaet erbabi abdulqadir yapchan (58 yash), 1 – séntebirde istanbul sefaköydiki öyide saqchilar teripidin nazaretke élinip, 29 – séntebirgiche bakirköydiki oxshash bolmighan saqchi merkezliride nezerbent astida tutulghan. arqidin bakirköy edliye mehkimisige yollanghan we bakirköy 5- sulhi jaza mehkimisi uni qoyup bergen. emma, teptish xadimining étirazigha asasen uyghur jamaet erbabi yapchan qaytidin nazaretke élinip sotlanghandin kéyin, üstidin 40 künlük hökümname élan qilinip, maltepe türmisige yollanghan. xewerde ilgiri sürülüshiche, bu jeryanda türkiyening munasiwetlik edliye tarmaqliri xitay dairilirining yapchangha alaqidar «pakit» we «höjjet» lerni türkiye terepke sunushini kütidiken.
xewerde, béyjing dairilirining 2002 – yili uyghur jamaet erbabi abdulqadir üstidin chiqarghan qizil bashliq höjjitige aridin 14 yil ötkendin kéyin tüzitish kirgüzgenliki, yéngi höjjette xitayning uni döletni parchilash bilen eyibligenliki qeyt qilindi. 2001 – yili türkiyege ayagh basqan yapchanning 15 yildin buyan istanbulda istiqamet qiliwatqanliqi, 84 yashliq anisining uyghur élide qamaqqa élinghanliqi, uning xususen yashlarni térrorluq paaliyetliridin yiraq tutush bilen tonulghan kishi ikenliki toghrisidiki keng uchurlargha orun bérildi.
