«térrorizmgha qarshi küresh mesiliside sodilishishqa bolmaydu»

türkiye awazi radiyosi xewiri: yildirim adalet we tereqqiyat partiyesi merkizide merkizi qarar chiqirish we ijraiye heyiti ezaliri bilen iptar ziyapitida bir yerge jem bolghanda qilghan sözide, 64 – hökümet wezipe ötigen mezgilde yawropa ittipaqi bilen köchmenlerni qayta qobul qilish kélishimi we türkiye puqralirining yawropa döletliride wizisiz sayahet qilishi pilanining öktebirdin iyun éyigha kéchiktürülüshi hemde köchmenler sewebidin türkiye öz üstige alghan maliye chiqimni yéniklitishni öz ichige alghan kélishimni xatiriletti, türkiyening birlik we barawerliki, zémin pütünlükidinmu muhim nerse yoqluqini tekitlep mundaq dédi: «herqandaq bir kélishim, herqandaq bir imkaniyet we yawropaning puqralirimizgha wizisiz sayahet qilish imkaniyiti yaritip bérishi qatarliqlar bizning térrorizmgha qarshi küresh iradimizni qilche tewritelmeydu, bu mesililerde sodilishishqimu bolmaydu. yawropaliq dostlirimiz emdi közini yoghan échip, heqiqetni körüshi kérek. ular ya türkiyege qulaq sélish yolini tallishi, yaki türkiyening birlik we barawerliki, mewjudiyitige qarshi térrorluq paaliyetlirini élip bériwatqan térrorluq teshkilati unsurlirining ighwagerlikige aldinish yolini tallishi kérek. baghrigha bésiwatqan térrorluq teshkilati ularnimu perishan qilidu. ete - ögün waqit ötüp kétishi mumkin. silerning ziddiyetlik pozitsiyenglar we siyasetliringlar ete – ögün bixeterlik mesilisi süpitide aldinglargha chiqishi mumkin, shu waqittimu türkiye yene silerni qollaydu.»

bash ministir yildirim engliye xelqining yawropa ittipaqidin chékinish qarari toghruluq toxtalghanda mundaq dédi: «kémirin saylam kürishi jeryanida türkiyeni kozér qiliwalghan we ‹türkiye aridin yene 3 ming yil ötsimu yawropa ittipaqigha kirelmeydu› dégenidi. uning bu sözliri pütkül türkiye xelqini qattiq azablighanidi. emma ingliz saylighuchilar uning sözlirini qilche étibargha almay, del eksiche qarar berdi.»

référandumning nishani bolghan yawropa ittipaqining engliye xelqining qararidin obdan sawaq élishi lazimliqini eskertken yildirim mundaq dédi: «yawropa ittipaqi yéqindin buyan hemmini baghrigha bésish we keng dairilik siyaset yürgüzüshning ornigha, etrapigha sépillarni soqup, chégralirini taraytish yolini tallidi. rayonda yüz bériwatqan musapirlar tiragédiyesi hemmige ayan. rayonda milyonlarche musapirlarni baghrigha bésiwatqan birdin - bir dölet türkiyedur. tolimu epsuski, yawropaliqlar bu mesilidimu sinaqtin ötelmidi, chünki ular bu mesilige kelgende qattiq biperwaliq qildi.»