«rusiye mesum insanlarni öltürüsh qilmishidin hésab bérishi kérek»
jumhur reis rejep tayyip erdoghan rusiyening türkiyening süriyege qoshun ewetishke teyyarliniwatqanliqini ilgiri sürüshige qattiq naraziliq bildürdi.
türkiye awazi radiyosi xewiri: jumhur reis erdoghan, «rusiye aldi bilen süriyede mesum insanlarni öltürüsh qilmishidin hésab bérishi kérek» dédi.
jumhur reis erdoghan sénégalda pirézidént makiy sal bilen ötküzgen qoshma axbarat élan qilish yighinida muxbirlarning soallirigha jawab berdi hemde bir muxbirning rusiyening türkiyening süriyege qoshun ewetishke teyyarliniwatqanliqini ilgiri sürgenlikige munasiwetlik soaligha jawab bergende mundaq dédi: «rusiyening bu pozitsiyege külüp qoyimen, xalas. rusiye aldi bilen süriyede mesum insanlarni öltürüsh qilmishidin hésab bérishi kérek. derweqe rusiyening süriye hökümiti bilen birlikte öltürgen insanlarning sani 400 minggha yetti. nöwette rusiye süriye zéminida ishghal herikiti élip barmaqta.»
rusiye bilen süriye hökümitining döletni weyran qiliwatqanliqini, türkiyening bolsa urush qurbanlirini méhman qiliwatqanliqini eskertken erdoghan enqerening köchmenlerni ishqa orunlashturush üchünmu xizmet ishlewatqanliqini qeyt qildi hemde süriyede beshshar esed hökümitining alliqachan yimirilgenlikini tekitlep mundaq dédi: «daésh térrorluq teshkilatidur, nöwette bashqa teshkilatlarmu süriyeni bölüshüwalghan. türkiyege kelsek, türkiye nöwette tehditke duch kelmekte. bizning süriye bilen 911 kilométirliq chégra liniyemiz bar, rusiyening chégra liniyesi barmu? ruslarning süriyede néme ishi bar?»
erdoghan istanbulda bu yil chaqirilidighan islam hemkarliq teshkilati ali derijilik rehberler yighini toghruluq toxtalghanda mundaq dédi: «aldi bilen bu yighinda islam düshmenliki, islam döletlirini parchilash, bölüsh heriketlirige qarshi muhim qararlarning élinidighanliqigha ishinimen. daésh, p k k we boko haram qatarliq térrorluq teshkilatlirining buzghunchiliq heriketlirige qarshi muhim qararlarning élinishi shert dep qaraymen.»
