salamlishimen chünki...

türkiye awazi radiyosi: tilimizgha ereb tilidin kelgen «salam» dégen söz, tinchliq, ishench we xatirjemlik dégen menilerni bildüridu. salamlishish, birsige yaki bir topqa yéqinliq, söygü we méhribanliqini namayan qilish, saghlamliq, aman - ésenlik we muweppeqiyet tileshni körsitidu. salamlishish ijtimaiy munasiwette muhim qedem bolup, barliq medeniyetlerde keng qorsaqliq, hörmet we alaqe maharitini ekis ettüridighan asasliq heriket dep qarilidu. salamlishish yene, kishilerge aktip tesir körsitish we chüshinishlik bir alaqe muhiti yaritishning tunji qedimi hésablinidu.

ijtimaiy mewjutluq hésablinidighan insanlarning mustehkem ijtimaiy jemiyet yaritishida salamlishish muhim rol oynaydu. salamlishish kishiler arisida ijtimaiy rishte ornitish we jemiyet ichide maslishishning bir yoli hésablinidu. udulidiki kishide tunji ijabiy tesir peyda qilidighan salamlishish, öz nöwitide yene uzun muddetlik munasiwet qurushtek muhim rollarghimu ige.  

 *** **** **** *********

 tunji uchrishishta edeplik we hörmetlik heriketlerni qilish, qarshi tereptin birer nerse telep qilghanda arzuyimizni téz emelge ashurushni asanlashturidu. mesilen, birer dukan yaki banka shöbisige salam bérip kirginimizde xizmetchilerning bizge téximu semimiy we külümsirep yéqinlishidighanliqigha shahit bolimiz.

salamlishish alaqini bashlash we dawamlashturushning birinchi qedimi shundaqla medeniyet qaidisi we teqezzalirigha emel qilish hésablinidu. kütülgen heriketlerni namayan qilish kishilerning ijtimaiy inaqliqini ashurup, ünümlük ijtimaiy jemiyetning shekillinishige töhpe qoshidu.

gerche salamlishish uslubi medeniyetlerning her xilliqigha we rayonlargha köre perqliq bolsimu, emma asasiy jehettin edeplik we hörmet bilen bashqilargha yéqinlishishning usuli dep qarilidu. tonumaydighan bir kishige ésenlik tilesh we bizdin uninggha ziyan yetmeydighanliqini bildürüsh bolup, salamlishish arqiliq söhbetni bashlash, baghlinishi küchlük bir jemiyet berpa qilishtiki addiy, emma ünümlük qedemdur.