ghezzede kichik balilar we bowaqlar achliqtin ölmekte

hörmetlik radiyo anglighuchilar! «küntertip we analiz» namliq pirogrammimizning bügünki bölümide siyaset, iqtisad we jemiyet tetqiqatliri fondi jemiyiti «SETA» ning tashqi siyaset tetqiqatchisi jan ajun teripidin teyyarlanghan «ghezzede kichik balilar we bowaqlar achliqtin ölmekte» témiliq analizni diqqitinglargha sunimiz.

***** ** **** *** *** ****

hamas we bashqa pelestinning israiliyege qarshi turush qurulmiliri qozghighan aqsa tupani namliq hujumidin buyan, israiliyening ghezzeni ishghal qilish herikiti dawamlashmaqta. ikki yérim milyon kishi yashaydighan 360 kwadrat kilométirliq rayon her tereptin qamal qilinghan bolup, israiliye rayonni hem hawadin, hem quruqluqtin bombardiman qilish arqiliq puqralani qesten qirghin qilmaqta. hetta yardemlerning rayongha kélishige israiliyening tosqunluq qilishigha egiship, emdilikte xelq, bolupmu kichik balilar we bowaqlar achliqtin jan bermekte. dunya bolsa, tamasha körüsh bilen kupaye qilmaqta.

israiliyening ghezzediki ishghaliyiti dawamlishishigha egiship sheherning %80 i dégüdek tamamen weyran bolghan ehwalda turmaqta. texminen ikki yérim milyon kishi yashaydighan 360 kwadrat kilométirliq rayon her tereptin qamal qilinip, hawadin we quruqluqtin 24 saet bombardiman qilinmaqta. israiliye buningliq bilenla boldi qilmastin, insanperwerlik yardemlerning rayongha yétip kélishigimu asasen dégüdek tosqunluq qilmaqta.  

ghezzening shimalida qapsilip qalghan puqralar acharchiliqta qalghan hazirqi weziyette, b d t din kelgen eng yéngi sanliq melumatlargha asaslanghanda, nurghunlighan kichik bala we bowaqlar yémeklik yétishmeslik we ussuzluqtin qaza qilghan ehwalda turmaqta. tümenligen puqralar qesten bombardiman arqiliq öltürülüshtin sirt, yémeklik we sugha érishelmeslik sewebidinmu hayatidin ayrilmaqta. epsuski, bularning hemmisi dunyaning közliri aldida yüz bermekte. amérika qatarliq gherb döletliri gerche obrazlirini qutquzush üchün her xil bayanat we heriketlerde bolsimu, emma israiliyening ishghaliyiti we qirghinchiliqini hem siyasiy, hem herbiy jehettin keng kölemde qollap quwwetlimekte. bolupmu amérika hawa köwrüki qurup, her küni dégüdek israiliyege herbiy oq-dora toshimaqta. b d t xewsizlik kéngishi qatarliq organlarmu israiliyege paydiliq meydan tutushni dawamlashturmaqta. gerche baydin nétanyahugha türlük teleplerni qoyghandek qilsimu we urush toxtitish toghrisida bayanatlarni élan qilghandek qilsimu, emeliyette israiliyeni qollashni dawamlashturmaqta.

  ghezzede yüz bergen qirghinchiliqlar hazir kichik bala we bowaqlarning achliq we ussuzluqtin ölüshige seweb boluwatqan weziyette turghanliqi hemmige melum. israiliyeni qollawatqan gherb dunyasi elwette bu jinayetlerning hemmige shériktur. gherbte alemshumul wijdan herikitining bir qismi bolghan nurghun kishilermu bar, elwette. ular bayanat élan qilish we heriket teshkilleshtin yanmay kelmekte. lékin dölet qatlimida siyaset özgergini yoq.

 nitaniyahuning urush kabinéti hamasni herbiy jehettin yoqitalmaydighanliqini obdan bilidighan bolghachqa ular asasliq diqqitini hamasni emes, belki ghezzeni yoqitishqa, puqralarni qirghin qilishqa we xelqni sina yérim ariligha sürgün qilishqa merkezleshtürmekte. türkiye we jenubiy afriqa qatarliq döletler pütün küchi bilen israiliyege qarshi bir wijdan ittipaqi qurushqa tirishmaqta. lékin ne islam döletliri, ne bashqa döletler israiliyege qarshi chékindürüsh xaraktérliq tedbirlerni yolgha qoyghini yoq. bolghuluqning hemmisi ghezzediki puqralargha, kichik balilargha we bowaqlargha bolmaqta.

belkim iranni tirnaq ichige élishqa bolsa kérek. iran we uning wakaletchi tarmaqliri bolghan hizbullah bilen xusiylar israiliyege qarshi töwen sewiyede herbiy heriketlerni élip barmaqta. xusiylarning qizil déngizni we babil mandebni tosup qoyushi yuqiriqi nuqtidin ünümlüktek körünsimu, emma israiliyeni tosushqa yéterlik istratégiye dégili bolmaydu. bolupmu, hizbullah bu urushning béshida intayin keskin sözlerni qilip, «eger ishghaliyet bashlisa, biz pütün küchimiz bilen israiliyege qarshi küresh qilimiz» dégen turughluq sözige emel qilmay, kütülgendin tolimu töwen sewiyede heriket qilmaqta. bu yerde elwette amérikaning rayonda herbiy mewjutluqini mustehkemlep, tehdit sélishliri tesir körsetken bolishimu mumkin.

  axirida, islam döletliri ne diplomatik, ne siyasiy, ne herbiy jehettin israiliyeni tosidighan héchqandaq heriket qilmidi. gherb döletliri, bolupmu amérika we engiliye israiliyeni qirghinchiliqigha shérik bolidighan shekilde herbiy we siyasiy yardemler bilen teminleshni dawamlashurmaqta.