konya tonur pörisi (samsisi)

türkiye awazi radiyosi: türkiyening ottura anadolu rayonigha jaylashqan tarixiy sheher konya, türk yémek-ichmek medeniyitining oxshimighan türlirige sahibxanliq qilmaqta. bu yémek – ichmek medeniyitining kélip chiqishi, köchmen turmushtin muqim turmushqa ötüshning iznalirini özige mujessem qilghan bolup, taamlarni teyyarlashta tonurdin paydilinish anadoludiki eneniwi adetlerning biri. konya sheherlik hökümetning iltimasigha asasen, 2023- yili türkiyening rayonlargha asasen tizimgha élinghan mehsulatliri sépige qoshulghan «konya tonur pörisi», bughday uni, su, tuz we yéngi échitqu bilen yughurulghan xémirning ichige qiyma yaki bashqa nersiler sélinip, tonurda pishurulidu. échilghan xémirning ichige adette qoy sütidin teyyarlanghan pishlaq bilen rayonning dora ösümlükliridin teyyarlanghan arilashma xuruchlar sélinidu. uningdin bashqa piyaz bilen arilashturulghan qiyma yaki  berengge salidighan ehwallarmu bar. pörini teyyarlash üchün, aldi bilen yoghurulup bir dem tindurulghan xémir, teng alte bölekke ayrilidu. zuwullanghan alte parche ximér 20 santimétir chongluqta yumilaq échilip, otturisigha texminen 100 gram etrapida xuruch qoyulidu, andin xémirning ong we sol qismi üsti terepte birleshtürülidu. pörining xémiri texminen 25 santimétir kelgüdek shekilde asti terepke sozulidu. teyyarlanghan xémir otun sélip tindürülghan tonurgha yéqilidu. köyüp ketmesliki üchün, pörining otqa qaraydighan teripi höl qilinidu. pishish jeryanida, örlep dumbaqlishiwélip, ichidiki xuruchlarning tökülüp ketmesliki üchün, pörini üsti teripi téshiwétilidu. 10 – 15 minut ichide otqa qaqlanghan qismi qiziridighan pöre, tömür qisqach bilen tonurdin élinip, qiziq chéghidila xémir birleshtürülgen yerliridin késilidu.  bu jeryanda, bashqa bir qachida éritip teyyarlanghan sériq may, pörining üsti we ichige tökülidu. konya tonur pörisi qiziq halitide méhmanlargha teqdim qilinidu.