enqere toshqini

bügünki künde nurghun döletlerde yétishtürülidighan «angora toshqini» ning enqeredin dunyaning herqaysi jaylirigha tarqalghanliqini bilemsiz?

dunyada «angora toshqini»  dep atilidighan enqere toshqini, yumshaq we uzun yungluq toshqandur. bu toshqanning kélip chiqish menbesi türkiyening paytexti enqere  bolup , bu yerdin dunyaning herqaysi jaylirigha tarqalghan.

tarixiy menbelerge qarighanda, enqere toshqinining nesli 1723-yili türkiyede tügep ketken. oxshash mezgilde, yawropadiki firansiye aqsöngekliri ichide eng alqishqa érishken ermek haywan enqere toshqini idi. bu toshqan 1900-yillarning bashlirida amérikada tonulghan. aridin qanche esirler ötkendin kéyin, gérmaniyede yashaydighan bir türkiye puqrasi teripidin türkiyege qayturup kélingen enqere toshqini, ana yurtining muhitigha asanla maslishidu.  shuning bilen, bu toshqan qayta yétishtürülüshke bashlinidu.

enqere toshqini asasliqi yungi, andin göshi we térisi üchün béqilidu. yung ishlepchiqirish üchün yétishtürülidighan birdinbir toshqan nesli enqere toshqinidur. her bir toshqan ottura hésab bilen yiligha bir kilogiram yung ishlepchiqiridu. enqere toshqini intayin yénik,  yungi intayin yumshaq, yungining izolyatsiyelik xususiyiti yuqiri bolup, yuqiri issiqliqni saqlaydu. bu xususiyetliri tüpeyli, bu toshqanning yungi köpinche rext, doppa, popayka, ediyal, bowaqlar kiyimliri we qar téyilish kiyimlirini ishlepchiqirishta ishlitilidu. éléktir magnitliq xususiyiti tüpeyli, rématizm bimarliri üchün ishlepchiqirilighan alahide kiyimlerningmu asasliq matériyali hésablinidu. u yene awaz dolqunini ötközmeydighanliqi üchün, awiyatsiye we alem qatnishi sanaitidimu ishlitilidu. enqere toshqinining altun qimmitidiki yungi qoy yungigha qarighanda sekkiz hesse issiqliq béridu we sezgürlük peyda qilmaydu.

dunyada 10 ming tonnigha yéqin toshqan yungi ishlepchiqirilidu. tolimu epsuski, bügünki künde, enqere toshqini yungining asasliq menbesi,  uning ana yurti türkiye emes , belki dunya boyiche % 90  toshqan yungi ishlepchiqirilidighan xitaydur. dunya boyiche jenubiy amérika, awistiraliye we yawropadimu yétishtürülidighan, sani nechche milyongha yétidighan enqere toshqini, ana yurtidiki peqet bir qanche déhqanchiliq meydanidila béqilidu.