asmanni, zéminni we ularning arisidiki sheyilerni bikar yaratmiduq

türkiye awazi radiyosi: sad sürisi, 19 -27 - ayetler. qushlarnimu uninggha boysundurup berduq, ularmu (terep ـ tereptin) toplinip, dawud bilen bille tesbih éytatti, (taghlarning, qushlarning) hemmisi allahqa itaet qilghuchidur[19]. dawudning seltenitini kücheyttuq, uninggha hékmet we (hemme adem chüshinidighan) roshen söz ـ ibarilerni ata qilduq[20]. (i muhemmed!) dewa qilghuchilarning qissisi sanga yettimu? öz waqtida ular (dawud ibadet qiliwatqan) mesjidning témidin artilip chüshüshti[21]. eyni waqitta ular dawudning yénigha kirdi. dawud ulardin qorqti, ular (dawudqa): «qorqmighin, biz birimiz ـ birimizge chéqilghan ikki dewagermiz, bizning arimizda adilliq bilen höküm qilghin, naheq höküm chiqarmighin, bizni toghra yolgha bashlighin» dédi[22]. (ularning biri) «shübhisizki, méning bu qérindishimning 99 saghliqi bar, méning bir saghliqim bar, qérindishim u bir saghliqnimu manga bergin deydu, (arimizda bu toghruluq munazire bolup) u méni sözde yéngip qoydi» dédi[23]. dawud éytti: «u séning saghliqingni özining saghliqlirigha qoshuwélishni telep qilip rastla séni bozek qiliptu, nurghun shérikler (yeni dostlar), shübhisizki, bir ـ birige chéqilidu, peqet iman éytqan we yaxshi emel qilghanlarla (bir ـ birige chéqilmaydu) bular azdur». dawud bizning uni sinighanliqimizni bildi. perwerdigaridin meghpiret telep qildi, sejdige bardi. (allahqa) tewbe qildi[24]. biz uning xataliqini epu qilduq, u bizning dergahimizda elwette yéqinliqqa we yaxshi aqiwetke ige bolidu[25]. i dawud! séni biz heqiqeten yer yüzide xelipe qilduq, kishilerning arisida adilliq bilen höküm chiqarghin, nepsi xahishqa egeshmiginki, u séni allahning yolidin azduridu, allahning yolidin azghanlar hésab küni (yeni qiyamet küni) ni untughanliqliri üchün heqiqeten qattiq azabqa duchar bolidu[26]. asmanni, zéminni we ularning arisidiki sheyilerni bikar yaratmiduq, u (yeni ularni bikar yaritilghan dep qarash) kapirlarning gumanidur, kapirlargha dozaxtin way![27].