mutexessisler: süniy eqil axbarat wasitilirida tüptin özgirish hasil qilidu

her küni yéngi - yéngi özgirishler bilen insanlarning aldigha chiqidighan süniy eqil téxnologiyesi  bashqa nurghun sahelerge oxshash axbarat wasitiliri sahesisdimu ijabiy we selbiy nurghun özgirishlerni hasil qilishi mumkin.

süniy eqil hasil qiliwatqan yéngiliqlar nurghun paydilarni élip kelgendin bashqa, yene ishsizliq we ijtimaiy exlaq mesililirini keltürüp chiqirish yoshurun küchige ige.

nöwette köp sandiki kishiler süniy eqil yaki algorifma ibarisining menisini bilmey turupmu, kündilik turmushidin tartip saghlamliq, maarip uchurliri we istémal chiqimlirighiche hemme melumatlirini algorifma arqiliq hembehirlishidu. buning netijiside topliniwatqan sanliq melumatlarning saqlinishi we ularning insaniyetning ziyinigha ishlitilishige qarita endishiler talash-tartishlarni keltürüp chiqarmaqta.

insanlarning eqil-parasitini teqlid qilidighan bu téxnologiye distopiye bilen otopiye otturisida nahayiti inchike bir liniyening barliqini, bu liniyening kishilerning muhim ishliri teripidin belgilinidighanliqini otturigha qoymaqta. axbarat wasitiliri saheliri bolsa süniy eqil téxnologiyeliri eng köp  tesir körsitidighan sahelerning béshida kélidu.

médiya munbiri (Almost) ning qurghuchisi we bash muherriri kassi cho we Goodable shirkitining bash diréktori muhemmed lila süniy eqil téxnologiyelirining axbarat wasitiliridiki ijabiy - selbiy tesirliri we ularning bu sahege élip kelgen özgirishlirini otturigha qoyidu.

kassi cho algorifmalarning axbarat wasitiliridiki rolining nahayiti zorluqini tekitlep mundaq deydu: «muxbirlarning kespiy iqtidarini eng yaxshi shekilde namayan qilishi üchün, algorifmalar muxbirlarni öz meylige qoyuwétishimizde bizge yardemchi bolushi mumkin.  waqtimizni ziyaret xatirilirimizni yézish we mezmunini terjime qilish qatarliq ishlargha serp qilmaydighanliqimiz üchün, waqtimizdin téximu ünümlük paydilinishimiz mumkin.»

u süniy eqil insanlarning uchurlirigha asaslinidighanliqi üchün, kishilerning süniy eqilge guman bilen qaraydighanliqini eskertidu.

 cho «süniy eqil téxnologiyesi kishilerning ishsiz qélishigha sewebchi bolup qalidu», dep qarimaydighanliqini ottorigha qoyidu, hemde süniy eqil téxnologiyesining axbarat wasitilirini köp ishletken insanlarni zhurnalist bolushqa yüzlendüridighanliqini tekitlep mundaq deydu: «méningche bezi kishiler xizmitidin ayrilip qélishi mumkin. emma méningche bu bizni téximu ijadchan bolushqa ilhamlanduridu. chünki süniy eqil pikir yürgüzelmeydu, idiye hasil qilalmaydu. bu bizni téximu yaxshi zhurnalist bolushqa yétekleydu. chünki bundaq bolghanda biz yéngi pikirlerni otturigha qoyushqa, yéngi mezmunlarni hasil qilishqa, téximu yaxshi zhurnalist bolush üchün qandaq qilghanda süniy eqil téxnologiyesidin eng yaxshi shekilde paydilish heqqide oylinishqa bashlaymiz.»

algorifmalarning ziyini paydisidin köp bolushi mumkin

Goodable shirkitining bash diréktori lila algorifmalarning insaniyetke élip kélidighan ziyinining paydisidin köp bolushi mumkinlikini ottorigha qoyidu, hemde süniy eqil téxnologiyesining axbarat wasitiliri sahesini, muxbirliqni téximu yaxshi, téximu téz ögengili bolushtek ijabiy terepliri bolsimu, emma kelgüsi üchün zor xeter élip kélidighanliqini eskertip mundaq deydu: «eger éhtiyat qilmisaq, süniy eqil téxnologiyesi jemiyitimizni weyran qilidu. méningche bu heqiqeten xeterlik ehwal. kishilerning xata bilen toghrini perqlendürüsh iqtidarining tizginini süniy eqil téxnologiyesige tartquzup qoyushi nahayiti chong mesilidur.»

lila süniy eqil téxnologiyelirining tereqqiy qilishigha egiship nurghun kishilerning xizmitidin ayrilip qalidighanliqini tekitlep mundaq deydu: «eger muxbirlar süniy eqil téxnologiyesini ishletmise we süniy eqilning yéngi mezmun hasil qilish küchini chüshinip yételmise, bu oyunning xélila arqisida qalidu.»