bowaqlardiki yel mesilisini hel qilishning tebiiy chare - tedbirliri

eger kichik bowiqingizda yel mesilisi bolsa, töwendiki usullarni sinap béqing:

• bowiqingiz achliq sewebidin uzun yighlashtin burun uni ozuqlandurushqa bashlang. chünki bowaqlar achliqtin yighlighanda hawani yutuwalidu. qorsiqi bek échip ketken bowaq ozuqlandurulushqa bashlanghan haman hawani adettikige qarighanda téximu köp yutuwalidu. eger bowiqingiz oyghaq halitide yighlap ketse, uning axirqi qétim ozuqlandurulghinigha kem dégende bir-ikki saet bolghan bolsa, yene ozuqlandurushqa bashlang.

• yel peyda qilidighan amillarning béshida, meyli anidin yaki émizgidin bolushidin qetiynezer, bowaqlarning émish mesilisi kélidu. bowaq anisini téz émish jeryanida hawani yutqanda yel mesilisige duch kélidu. shunglashqa, bowiqingizni émitkende uning kökrikingizge mehkem yépishqanliqigha we hawani yutuwetmeslikige kapaletlik qilishingiz kérek.

• bowaqning yélini émitkendin kéyinla derhal chiqiriwétish kérek. hetta émitish jeryanidimu yeni emchek almashturghan waqittimu bowaqning yélini chiqiriwétish kérek. bowaqni émitkendin kéyin texminen 25 minut quchiqingizda tik turghuzung. bu ashqazan we kékirtek arisidiki kilapanni aram tapquzup, yelning shekillinishini melum derijide yéniklitidu.

• bowaqni émizge bilen émitish jeryanida uning téximu köp kékirishige kapaletlik qilish üchün, émitkendin kéyin bowiqingizni bir nechche minut tik tutung. buningdin bashqa yene, qaysisining bowiqingizning téximu téz we chachratmastin émishige muwapiq ikenlikini tallash üchün, oxshimighan émizgilerni – süt botulkilirini sinaq qilip baqsingiz bolidu. eger bowaqni süt botulkisi bilen ozuqlandursingiz, süt botulkisi émizgisining töshükining bek chong yaki bek kichik bolmasliqigha diqqet qiling.

• eger bowaq yel chiqirishta qiynalsa, bowiqingizni bir minut yatquzung, andin uni tik tutup, qayta sinang.

• bowiqingizning quchiqingizda yétish waqtini uzarting. kündüzi oyghaq waqitlarda balingizni quchiqingizgha köp éling.

• bowaqning putini issiq tutush intayin muhim. puti tongghan balilarda yel mesilisi köp körülüshi mumkin. bowaqlar uxlawatqanda ularning putini daim tekshürüp turush kérek. eger soghuq bolsa, issiq su xaltisi bilen issitish kérek.

• öyning témpératurasi bek issiq yaki bek soghuq bolmasliqi kérek.

bowaqning yéli qandaq chiqirilidu? yel chiqirish usulliri qaysilar?

bowaqlarning yélini chiqiriish üchün, ashqazangha yénik bésim ishlitip, yelni chiqiridighan töwendiki usullarni qollinish kérek:

• bowaqni düm yatquzup, qorsiqini saet yönilishide uwulash, andin tizlirini qorsiqi terepke heriket qildurush bowaqning yélini chiqirishta ünümlük rol oynaydu.

• ozuqlandurup bolghandin kéyin, bowaqni uning ashqazan qismigha yénik bésip peyda qilidighan shekilde quchiqida tutup, éngikini mürisige yölesh we  dümbisini uwulash arqiliq bowaqning yélini chiqiriwetkili bolidu.

• bowaqning qorsiqini uning putining üstige toghra kélidighan shekilde yatquzup, dümbisini uwulashmu yel chiqirish usulliridin biridur.

• yel chiqirish jeryanida ashqazangha bek köp bésim qilmasliqqa diqqet qilish kérek. chünki bu usul qusushni keltürüp chiqiridu.

• balingizni ozuqlandurup 15-20 minut ötkendin kéyin, xuddiy wélisipit pédalini aylandurghandek bowiqingizning putini asta – asta heriket qildurung.

• bowaqlar heddidin ziyade issiq, tar kiyim, aile jédel – majiraliri, heddidin ziyade ghidiqlinish qatarliq amillarning tesirige köp uchrighanliqtin, huzursizliq we heddidin ziyade yighlash bilen inkas qayturidu.

• bowaqlar ösüp yétilish süriti tézleshken mezgilde köprek émishni xalaydu.

bowaqni tinchlandurush üchün némilerni qilish kérek?

her bir bowaqni tinchlandurush usuli oxshimasliqi mumkin. buning üchün her xil usullarni sinap béqish kérek. töwendiki usullardin paydilinishqa bolidu.

• bowaqni ediyalgha orash,

• bowaqning qorsiqigha issiq höl löngge qoyush,

• bowaqni yuyundurush, andin organik zeytun yéghi yaki bowaqlar méyi bilen uwulash (kökrek boshluqidin tartip taki chatraqqiche aylanma heriketler sheklide uwulash) ücheyni janlanduridu. yénik bésim ishlitish arqiliq soldin onggha uwulash nahayiti paydiliq. bu ariliqta bowaqning putini qorsiqi terepke ittirish uning yel chiqirishini qolaylashturidu.

• baghrigha bésish,

• quchiqida yénik tewritish,

• aq awaz dep atilidighan bezi awazlarni anglitish. yéngi tughulghan bowaqlargha qattiq tesir körsitidighan bu awazlardin bowaqni  tinchlandurush meqsitide paydilinish mumkin. derweqe, bu awaz anining qarnidiki awazlargha  oxshishi mumkin. bowaqni chach qurutquch, tokluq süpürge qatarliq shawqun-sürenlik buyumlarning awazliridin paydilinip tinchlandurush mumkin. özini bixeter hés qilghan bowaqni tinchlandurush we uxlitish téximu asan.

• elley naxshisi yaki tinichlandurush muzikisi anglitish,

• chuquq sanjiq peyda qilghan we yighlawatqan bowaqni bowaq harwisida aylandurup uxlitishmu ünümlük usuldur.

• bowaq harwisi bilen aylandurush,

• émizge ishlitish,

• ana namzatining hamildarliq mezgilide dawamlashturghinidek qisqa musapilik méngip bérishmu bowaqning tinichlinip, uxlishigha yardem béridu.

bowaqtiki yel mesilisi üchün ünümlük dora yoq.

bowaqni quchiqida kötürüsh, uning heddidin ziyade ghidiqlinishidin saqlinish, bolupmu kech saet 19:00 etrapida daim yuyundurush, qorsiqigha issiq höl löngge qoyush, putini issiq tutush we uwulash bowaqning yighlash waqtini qisqartidu.

chuquq sanjiq peyda qilghan bowaqlarning aile-tawabiatlirigha balisining yaxshi yétiliwatqanliqi, balisida saghlamliq mesilisi yoqluqi, buning eng kéchikkendimu üch ayghiche dawamlishidighan waqitliq ehwal ikenlikini bildürüsh intayin muhim.

bowaqlarning aile-tawabiatlirini pisxika jehettin qollash intayin muhim. bu ehwalgha taqabil turushning birinchi sherti, ata-anilargha bu mesile heqqide tepsiliy melumat bérish we ularning könglini teskin tapquzushtur. chuquq bowaqta sanjiq peyda qilghan mezgilde ata – anilarning eng muhim wezipisi bowaqni tinchlandurush bolushi kérek.