topkapi sariyi muzéyidiki farfor qacha-quchilar

topkapi sariyi muzéyida texminen 16 ming farfor qacha - qucha barliqini bilemsiz?

topkapi sariyida 16 ming parchigha yéqin farfor buyumlar bar. topkapi sariyi muzéyining dunyagha dangliq we özgiche farfor buyumliridin birini xitay farfor qacha – quchiliri teshkil qilidu. bu xitayning dölet sirtidiki eng köp farfor buyumliri bolup, sani on mingdin ashidu. bu farfor buyumlarning sani 13-esirning axiridin 20-esirning bashlirighiche dawamliq köpeygenliki üchün alahide ehmiyetke ige. xitayning farfor buyumliridin bashqa, yaponiyening farfor buyumliri, yawropaning farfor buyumliri we türk farfor buyumliri dep atilidighan farfor qacha – quchilar  topkapi sariyining bashqa muhim farfor buyumlirini teshkil qilidu.

 topkapi sariyining yawropa farfor buyumliri toplimida texminen 5000 dane farfor qacha - qucha bar. yawropaning oxshimighan döletliride yasalghan, 15-esirdin 20-esirgiche bolghan mezgildiki farfor qacha - quchilardin terkib tapqan  topkapi sariyining farfor buyumliri toplimi san we köp xilliq jehette intayin mol bolup, yawropaning farfor qacha – quchilarni yasash  medeniyiti waqit tertipi boyiche eng yaxshi shekilde namayan qilinghan  farfor buyumlar toplimi hésablinidu.

 topkapi sariyining farfor buyumliri toplimi kül renglik, kök-aq renglik, bir xil we köp xil renglik farfor qacha - quchilarni öz ichige alidu.

islam döletlirining dastixan medeniyitige asasen ishlengen chong razmérliq we mol bézeklik qacha - qucha we texsiler bu farfor buyumlarning eng közge körüngen parchiliri hésablinidu.

osmanli impériyesi sultanliri altun – kümüsh tawaqlarda tamaq yéyishni yaxshi köretti, shundaqla farfor qacha – quchilarda tamaq yéyishni tallaytti. «bolupmu farfor qacha – quchilarda tamaq yégende zeherlik maddilarni  bilgili bolidu»  dégen keng omumlashqan qarashqa asasen, sultanlar tamaq yégende farfor qacha – quchilarni tallaytti.

nepis farfor qacha – quchilar osmanli impériyeside her daim kündilik hayattiki küch we bayliqning namayendisi  bolup kelgen. bezide farfor qacha – quchilarning üstige bir qatar özgiche bézeklermu chüshürülgen. mesilen, adettiki farfor qacha - quchilar qimmetlik tashlar bilen bézelgen, buzulghan farfor qacha - quchilar oxshimighan métal ewrishim boghumlar bilen rémont qilinip, oxshimighan shekilde ishlitilidighan buyumlargha özgertilgen. bu hüner – senetler osmanli impériyesining métal buyumlirini yasash medeniyiti we osmanli impériyesi sariyi bézekchilik medeniyitining eng yarqin namayendiliridin biri hésablinidu.